ވިނަރެސް ޓަވަރުތަކުން ކާރު ޕާކު ކުރުމަށް ދޫކުރާ ޖާގަތައް ގަންނަން ދިން މުއްދަތު އިތުރުކޮށްފިއެވެ.

ހައުސިން ޑިވެލޮޕްމެންޓް ކޯޕަރޭޝަނުން އިއްޔެ ބުނީ ހުޅުމާލެ ދެވަނަ ފިޔަވަހީގައި ހުންނަ ވިނަރެސް ޓަވަރުތަކުގައި ކާރު ޕާކު ކުރާނެ ޖާގަ ދޫކުރުމަށް މިދިޔަ މަހުގެ ސައްބީހުން މި މަހުގެ ފަސް ވަނަ ދުވަހުގެ ނިޔަލަށް ހުޅުވާލި ފުރުސަތު މި މަހުގެ 12 ވަނަ ދުވަހާއި ހަމައަށް އިތުރުކޮށްފައިވާ ކަމަށެވެ.

އެޗްޑީސީން ބުނީ ވިނަރެސް ޓަވަރުތަކުން ޕާކިން ޖާގަތައް ދޫކުރުމަށް ނިންމާފައި ވަނީ ދެ ގޮތަކަށް ކަމަށެވެ. އެއީ، އިމާރާތުގެ ތެރެއިން، ކާރު ރެޖިސްޓްރީކުރުމުގެ ހުއްދައާ އެކު، ޖުމްލަ 76 ޖާގަ އާއި އިމާރާތުގެ ބޭރުން ހަމައެކަނި ޕާކުކުރުމުގެ ބޭނުމަށް 78 ޕާކިން ޖާގަ އެވެ.

ވިނަރެސް ޓަވަރުތަކުން ކާރު ޕާކުކުރާނެ ޖާގަ ނެގުމަށް ރެޖިސްޓްރޭޝަން ހުށަހެޅުމުގެ ފުރުސަތު 12 ޑިސެމްބަރުގެ ނިޔަލަށް ވަނީ އިތުރު ކުރެވިފައި.

އިތުރު މައުލަުމާތު: https://t.co/dMAKVEvdN8 pic.twitter.com/1Y5LL4j4gA

— Housing Development Corporation (@hdcmaldives) December 6, 2024

މި ޕާކިން ޖާގަތައް ވިއްކަނީ ވިނަރެސް ފްލެޓް ގަތުމުގެ އެއްބަސްވުމުގައި އެޗްޑީސީއާއެކު ސޮއިކޮށްފައިވާ މައި-އެޕްލިކަންޓުންނަށް ކޮންމެ ފަރާތަކަށް 1 ޖާގައެވެ. އަދި އެޗްޑީސީއަށް ދައްކަން ޖެހޭ އެއްވެސް ފައިސާއެއް ނުދައްކާ ހުރި މީހަކަށް ވެގެން ނުވާނެ ކަމަށް އެޗްޑީސީން ބުނެފައިވެއެވެ.

އެޗްޑީސީން ބުނީ އިމާރާތުގެ ތެރެއިން ވިއްކާ ޕާކިން ޖާގަތަކުގެ ބީލަން ފެށޭ އަގަކީ 650،000 ރުފިޔާ ކަމަށެވެ. އަދި ޕާކިން ޖާގަ ގަންނަ މީހުންނަށް އެ ޖާގައަށް ކާރު ރަޖިސްޓްރީކުރުމުގެ ހުއްދަ ދޫކުރާނެ ކަމަށްވެސް އެޗްޑީސީން މަޢުލޫމާތު ދީފައިވެއެވެ.

އޭގެއިތުރުން އިމާރާތުގެ ބޭރުން ވިއްކާ ޕާކިން ޖާގަތަކުގެ ބީލަން ފެށޭ އަގަކީ 2،000 ރުފިޔާއެވެ. އެއީ ފަސް އަހަރުގެ މުއްދަތަށް ކުއްޔަށް ދޫކުރާ ޖާގަތަކެކެވެ. އެ ޖާގަތަކުގައި ރަޖިސްޓްރީ ކުރުމުގެ ހުއްދަ ނުދޭނެ ކަމަށް އެޗްޑީސީން ހާމަކޮށްފައިވެއެވެ.