ނޭވާލާ ނިޒާމުގެ ދެ ބައްޔަކަށް ހާއްސަ ދެ ބޭހެއް ސްޓޭޓް ޓްރޭޑިން އޮގަނައިޒޭޝަން (އެސްޓީއޯ)އިން ރާއްޖޭގެ ބާޒާރަށް ނެރެފިއެވެ.

އެސްޓީއޯއިން މި ދެ ބޭސް ނެރުނީ ދުނިޔޭގެ މަޝްހޫރު އެއް ބޭސް ކުންފުނި އެސްޓްރާޒެނެކާއާ ގުޅިގެންނެވެ. މި ދެ ބޭހަކީ ނޭވާލާ ނިޒާމަށް ޖެހޭ ދެ ބައްޔެއް ކަމަށްވާ އެސްތުމާ އާއި ސީއޯޕީޑީ އަށް ހާއްސަ ދެ ބޭހެއް ކަމަށްވާ ސިމްބިކޯޓް ޓަރބޫހެލާ އާއި ޕަލްމިކޯޓް ރެސްޕުލްސްއެވެ.

މި އާ އުފެއްދުންތަކަކީ ނޭވާލާ ނިޒާމުގެ ސިއްހަތުގެ މުހިންމު ކަންކަމަށް ބަލައި، ނޭވާހިއްލުމާއި ސީއޯޕީޑީ މެނޭޖްކުރުމުގައި މުހިންމު އުފެއްދުންތަކެކެވެ.

ޑިސެންބަރު މަހުގެ ހަތް ވަނަ ދުވަހު ދަރުމަވަންތަ ހޮސްޕިޓަލްގެ 24 ވަނަ ފަންގިފިލާގައި ބޭއްވި ހާއްސަ ރަސްމިއްޔާތެއްގައި މި ބޭސްތައް ތައާރަފް ކޮށްފައިވާއިރު މި ރަސްމިއްޔާތުގައި އިންޑިއާގެ މަޝްހޫރު ޕަލްމޮނޮލޮޖިސްޓެއް ކަމަށްވާ ޑރ. ރެނިސް ޑޭވިސް ބައިވެރިވެލެއްވިއެވެ.

މި ރަސްމިއްޔާތުގައި ގާތްގަނޑަކަށް 60 ފިޒިޝަނުން ބައިވެރިވެ، ބަލިމީހުންނަށް ދޭ ފަރުވާގެ ނަތީޖާ އިތުރުކުރުމަށް ’ގައިޑްލައިން ޑައިރެކްޓް ޓްރީޓްމަންޓްތަކާ‘ ބެހޭ ގޮތުން މަޝްވަރާތައް ކުރިއަށް ގެންދިޔައެވެ.

ޒަމާނީ ޑްރައި ޕައުޑަރ އިންހެލަރެއް ކަމަށްވާ ސިމްބިކޯޓް ޓަރބޫހެލަރަކީ ބޭނުންކުރަން ފަސޭހަ ގޮތަކަށް ފަރުމާކޮށްފައިވާ އެއްޗެކެވެ. އަދި މިހާރު ފިހާރަތަކުން ލިބެން ހުންނަ އާދައިގެ ރިލީވަރތަކާ އަޅާބަލާއިރު މިއީ އަވަސް، މޮޅު، އަދި ފަސޭހައިން ނޭވާލާ ނިޒާމަށް ލުއިތަކެއް ލިބިގެންދާ އެއްޗެކެވެ. ހަމައެއާއެކު ޕަލްމިކޯޓް ރެސްޕުލްސް އަކީ ހަ މިނެޓު ތެރޭގައި ނޭވާލާ ނިޒާމުގެ މިއުކަސް ފަށަލަ ތެރެއިން ހަލުވިކަމާއެކު ގިރާވެ، އެންމެ 30 މިނެޓުގެ ތެރޭގައި ޕަލްމޮނަރީ ވެސޯކޮންސްޓްރިކްޓިވް އިފެކްޓެއް ފޯރުކޮށްދޭ އެއްޗެކެވެ.

މި މެކޭނިޒަމްގެ ސަބަބުން ނޭވާހިއްލުމުގެ މައްސަލަތަކަށް ލުޔެއް ލިބިގެންދެއެވެ.