ފުވައްމުލަކު ސިޓީގައި މަސްތުވާތަކެތީގެ ވިޔަފާރިކޮށް މަނީލޯންޑާ ކުރާ ބޮޑު ނެޓްވޯކެއް ފުލުހުން ހޯދައިފި އެވެ.

ފުލުހުންގެ ހިދުމަތުން މިއަދު ބުނީ ފުވައްމުލައް ސިޓީގައި މަސްތުވާތަކެތީގެ ވިޔަފާރިއާ ދެކޮޅަށް ދިވެހި ފުލުހުންގެ ހިދުމަތުން "އޮޕަރޭޝަން ވެށި ރައްކަލް" ގެ ބޮޑު އޮަޕަރޭޝަނެއް މިދިޔަ ޖެނުއަރީން ފެށިގެން ކުރިއަށް ގެންދާ ކަމަށެވެ.

ފުލުހުން ބުނީ އެ އޮަޕަރޭޝަންގެ ދަށުން މިހާތަނަށް 4,048 ހޮޓްސްޕޮޓް ބަލައި ފާސްކޮށްފައިވާ ކަމަށެވެ. އަދި 1,147 މީހުން ހުއްޓުވައި ސުވާލުކޮށް ބަލައި ފާސްކޮށް 58 މީހަކު ހައްޔަރުކުރި ކަމަށް ވެސް ފުލުހުން ބުނެފައި ވެއެވެ.

ފުލުހުން ބުނީ ހައްޔަރުކުރި މީހުންގެ މައްޗަށް ތުހުމަތު ކުރެވޭ ޖުމްލަ 75 މައްސަލައެއް ތަހުގީގުކޮށް، ދައުވާކުރަން 65 މައްސަލައެއް ވެސް ފޮނުވާފައިވާ ކަމަށެެވެ.

ފުލުހުން ބުނީ މަސްތުވާތަކެތީގެ ވިޔަފާރިކޮށް މަނީ ލޯންޑަރ ކުރުމުގައި އިސްކޮށް ހަރަކާތްތެރިވާ ކަމަށް ބެލެވޭ ފުވައްމުލަކު ދެ މީހުން އިއްޔެވެސް ހައްޔަރުކޮށްފައިވާ ކަމަށެވެ. އެއީ ޏ. ފުވައްމުލައް / ދޫޑިގަން، ކަރަންކާވިލާ، އަހުމަދު ނިއުޝާދު (34 އަހަރު) އާއި ޏ. ފުވައްމުލައް / ދޫޑިގަން، ޒަމާނީގެ، ހަސަން އާޒިމް (29 އަހަރު) އެވެ.

އެ މައްސަލައާ ގުޅިގެން 21 މީހަކާއި ދެ ކުންފުންޏެއްގެ އެކައުންޓް ކޯޓު އަމުރުގެ ދަށުން ވަނީ ހިފަހައްޓާފައެވެ. އަދި އެ ފަރާތްތަކުގެ މައްޗަށް ތުހުމަތުކުރެވޭ މަނީ ލޯންޑަރިންގެ މައްސަލަ މިހާރު ބަލަން ފަށާފައިވާ ކަމަށް ވެސް ފުލުހުން ބުނެފައި ވެއެވެ.

"ފުލުހުންގެ ތަހުގީގަށް ހޯދިފައިވާ ގޮތުގައި، ފާއިތުވި ފަސް އަހަރު ތެރޭގައި އަހުމަދު ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވެއެވެ. އަދި ފާއިތުވި ދެ އަހަރު ތެރޭގައި ހަސަން އާޒިމްގެ ބޭންކު އެކައުންޓް މެދުވެރިކޮށް ހަތް މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާކަން ވަނީ ފާހަގަކުރެވިފައެވެ." ފުލުހުންގެ ބަޔާނުގައި ބުނެފައި ވެއެވެ.