ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ފަސް ލެޕްޓޮޕް ވަގަށް ނަގައިފި އެވެ.

ފުލުހުން މިއަދު ބުނީ އެޗްޑީސީން ފަސް ލެޕްޓޮޕް ވަގަށް ނެގި މައްސަލައެއް ރިޕޯޓުކޮށްފައިވާ ކަމަށެވެ. މިއަދު ފުލުހުންނަށް ރިޕޯޓުކުރި އެ މައްސަލައާ ގުޅޭ އިތުރު ތަފްސީލެއް އެ އިދާރާއިން ދީފައެއް ނުވެ އެވެ.

އެޗްޑީސީން ލެޕްޓޮޕްތަކެއް ވަގަށް ނަގާފައިވާއިރު މި ދަނޑިވަޅަކީ، ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ކަމަށްވާ "ބިންވެރިޔާ ސްކީމް"ގެ ބޭރުން ގޯތިތަކެއް ދިން ކަމަށް ތުހުމަތުވާ ކޮރަޕްޝަންގެ މައްސަލައެއް ފުލުހުންނާއި އޭސީސީ ގުޅިގެން ތަހުގީގު ކުރަމުންގެންދާ ދަނޑިވަޅެއްކަން ފާހަގަ ކުރެވެއެވެ.

ކޮރަޕްޝަންގެ މި މައްސަލައާ ގުޅިގެން އެޗްޑީސީގެ ކުރީގެ މެނޭޖިން ޑިރެކްޓަރު ފަޒުލް ރަޝީދު ހިމެނޭހެން ގިނަ ބައެއްގެ ޕާސްޕޯޓު ވަނީ ހިފަހައްޓާފައެވެ.

އެމްޑީގެ މަގާމުން ފަޒުލް އިސްތިއުފާ ދެއްވުމުން އެޗްޑީސީގެ މެނޭޖިން ޑިރެކްޓަރުގެ މަގާމަށް ކުރީގެ މިނިސްޓަރު މުޙައްމަދު މައުރޫފް ޖަމީލް ވަނީ އައްޔަން ކުރައްވާފަ އެވެ. އޭނާ އެ މަގާމަށް އައްޔަން ކުރައްވާފައި ވަނީ އިއްޔެއެވެ.