ދަޢުލަތުގެ ތިން ވުޒާރާގައި ހިނގި އަލިފާނުގެ ހާދިސާގެ ތަހުގީގަށް ރާއްޖެއަށް އައި އިންޑިއާ ޓީމު ފުރައިފިއެވެ.

ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރުމަންޓް މިނިސްޓްރީގައި އަލިފާނުގެ ހާދިސާ ހިނގާފައިވަނީ މި މަހުގެ 12 ވަނަ ދުވަހުގެ ހެނދުނު 6:30 ހާއިރުއެެވެ.

ގްރިން ބިލްޑިންގ ބްލޮކްގައި ރޯވި އަލިފާންގަނޑު ކޮންޓްރޯލް ކުރެވުނީ އެދުވަހު މެންދުރުފަހުގެ ވަގުތެއްގައެެވެ. އެ ޙާދިސާގައި ތިން ވުޒާރާގެ މުހިންމު ލިޔުންތަކާއި މެޝިނަރީޒް ވަނީ އަނދާ އަޅިއަށްވެފައެވެ.

އެހާދިސާގެ ތަހުޤީޤުގައި ބައިވެރިވުމަށް އިންޑިއާ ޓީމެއް ރާއްޖެ އައިސްފައިވާކަމަށް ވިދާޅުވީ ކޮމިޝަނަރު އޮފް ޕޮލިސް އަލީ ޝުޖާއު އެވެ. އަދި އިންޑިޔާގެ ހާއްސަ ޓީމުން ދިވެހި ފުލުހުންނާއެކު ތަހުގީގުގައި ހަރަކާތްތެރި ވަމުންދާކަމަށް ސީޕީ ޝުޖާޢު ވިދާޅުވެފައިވެއެވެ.

މިކަމާ ބެހޭގޮތުން ފުލުހުން މިއަދު ބުނެފައިވަނީ އިންޑިއާގެ ތަޖުރިބާކާރުންގެ ޚާއްސަ ޓީމު އެނބުރި އިންޑިއާއަށް ފުރާފައިވަނީ މިމަހުގެ 22 ވަނަ ދުވަހު ކަމަށެވެ.

“އިންޑިއާގެ ތަޖުރިބާކާރުންގެ ޓީމުން ވަނީ ހާދިސާ ހިނގި ތަން ބަލައި، ތަހުގީގު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާކޮށްފައެވެ. މީގެ އިތުރުން، ހާދިސާއާ ގުޅޭ ފޮޓޯ، ވީޑިއޯ އަދި ސީސީޓީވީ ފުޓޭޖްގެ އިތުރުން ހާދިސާއާ ގުޅުންހުރި މުހިންމު މައުލޫމާތުތައް ޓީމާ ހިއްސާކުރެވިފައިވާނެއެވެ. ފޯރުކޮށްދެވުނު މައުލޫމާތުތަކާއި ތަކެތި ދިރާސާކުރުމަށްފަހު، އެ ޓީމުގެ ހޯދުންތައް ދިވެހި ފުލުހުންގެ ޚިދުމަތާ ހިއްސާކުރުމަށް ވަނީ ހަމަޖެހިފައެވެ.” ފުލުހުން މީޑިއާއަށް މަޢުލޫމާތު ދީފައިވެއެވެ.

ފުލުހުން މިހާރުވަނީ އެހާދިސާގެ މަންޒަރު ދުށް ބައެއް ފަރާތްތަކުގެ ބަޔާންތައް ތަހުޤީޤަށް ނަގާފައެވެ.

އޭގެއިތުރުން އެ އަލިފާނުގެ ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ މޭޖަރ ކްރައިމް އިންވެސްޓިގޭޝަންގެ ނަންބަރު، 9911099 އަށް ގުޅުއްވައި ހިއްސާކުރުމަށް ފުލުހުން މީގެކުރިން އިލްތިމާސްކޮށްފައިވެއެވެ.