ކުޑަކުއްޖަކަށް ޖިންސީ ގޯނާކުރި މީހަކު 25 އަހަރަށް ޖަލަށް ލުމަށް ކްރިމިނަލް ކޯޓުން ޙުކުމް ކޮށްފިއެވެ.

މި މައްސަލަ ކުރިމިނަލް ކޯޓަށް ހުށައަޅާފައިވަނީ 2020 ވަނަ އަހަރުގެ ޑިސެންބަރު 17 ވަނަ ދުވަހު އެވެ. އަދި ކުރިމިނަލް ކޯޓުން މި މައްސަލަ ނިންމައި ހުކުމް އިއްވީ 2024 ވަނަ އަހަރުގެ ޑިސެންބަރު 30 ވަނަ ދުވަހު އެވެ.

މި މައްސަލާގައި ކްރިމިނަލް ކޯޓުން ކޮށްފައިވާ ޙުކުމްގައި ވަނީ ކުޑަކުދީންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 9 ވަނަ މާއްދާގެ (ހ) އާ ޙަވާލާދީ އެމާއްދާގެ (ށ) ގެ ދަށުން، ނަޞްރުﷲ ފާއިޒު، 15 (ފަނަރަ) އަހަރަށް ޖަލަށްލުމަށެވެ. އޭނާ 15 އަހަރަށް ޖަލަށްލުމަށް ޙުކުމް ކޮށްފައިވަނީ ކުޑަކުއްޖަކު އިތުބާރުކުރަންޖެހޭ މަޤާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ ޢަމަލެއް ހިންގުމުގެ ކުށް ސާބިތުވުމުންނެވެ.

ހަމައެއާއެކު ކުޑަކުދީންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 3 ވަނަ މާއްދާގެ (ހ) އާ ޙަވާލާދީ އެމާއްދާގެ (ނ) ގެ ދަށުން، ނަޞްރުﷲ ފާއިޒު، 10 އަހަރު ދުވަހުގެ މުއްދަތަށް ޖަލަށްލުމަށްވެސް ކްރިމިނަލް ކޯޓުން ޙުކުމްކޮށްފައިވެއެވެ.

ކުޑަކުދީންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ 3 ވަނަ މާއްދާގެ (ހ) ގައި ބުނެފައިވަނީ، މީހަކު ކުޑަކުއްޖެއްގެ ހަށިގަނޑުގައި، ޖިންސީ ނިޔަތެއް އޮވެގެން ގަސްތުގައި އަތްލައިފިކަމަށްވާނަމަ، އެކުރަނީ ކުށެއް ކަމަށެވެ.

އަދި 3 ވަނަ މާއްދާގެ (ނ) ގައި ވަނީ އެ މާއްދާގެ (ހ) ގައި ބަޔާންކޮށްފައިވާ ކުށް ސާބިތުވެއްޖެ މީހެއްގެ އަދަބަކީ 10 އަހަރާއި 14 އަހަރާ ދެމެދުގެ މުއްދަތަކަށް ޖަލަށްލުން ކަމަށެވެ.

ނަޞްރުﷲ ފާއިޒުގެ މައްޗަށް ދިވެހިރާއްޖޭގެ ޤާނޫނުލްޢުޤޫބާތުގެ 622 ވަނަ މާއްދާގެ (ހ) ގެ (7) ވަނަ ނަންބަރުގެ ދަށުން، އޮރިޔާން ކާޑު ގެންގުޅުމުގެ ކުށުގެ ދައުވާވެސް ދަޢުލަތުން އުފުލިއެވެ. ނަމަވެސް ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ މިންވަރެއްގެ ޝައްކެއްނެތި އެދަޢުވާ ޝަރީޢަތަށް ސާބިތުވެފައި ނުވާތީ އެކުށް އޭނާގެ މައްޗަށް ސާބިތު ނުވާ ކަމަށް ކްރިމިނަލް ކޯޓުން ވަނީ ނިންމާފައެވެ.

މި މައްސަލައަކީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށްވާތީ، ކްރިމިނަލް ކޯޓުން މައްސަލައިގެ ތަފްސީލުތައް ޢާއްމު ކޮށްފައެއް ނުވެއެވެ.