އެމްޕީއެލްގެ ސީއީއޯ މުހައްމަދު ވަޖީހު ފޭސްބުކުގައި މިއަދު ވިދާޅުވީ މިދިޔަ އަހަރު 66638 (ޓީއީޔޫސް) ކޮންޓެނަރައިޒް ކާގޯ އެތެތެކުރެވިފައިވާ އިރު، 150692 ފުރައިޓް ޓަންސްގެ ޖެނެރަލް ކާގޯ މިދިޔަ އަހަރު އެތެރެކޮށްފައިވާ ކަމަށެވެ.

މިއީ 2023 ވަނަ އަހަރާ އަޅާބަލާއިރު ކޮންޓެނެރައިޒް ކާގޯގެ ހަތް ޕަސެންޓް އަދި ޖެނެރަލް ކާގޯ 29 ޕަސެންޓް އިތުރުވުމެއް ކަމަށް ވަޖީހު ވިދާޅުވިއެވެ.

ވަޖީހު ވިދާޅުވީ މީގެ ކުރިން އެންމެ ގިނައިން ކާގޯ އެތެރެކޮށްފައި ވަނީ 2018 އާއި 2019 ވަނަ އަހަރު ކަމަށެވެ. އެގޮތުން 2018 ވަނަ އަހަރު 63002 ކޮންޓެއިރ (ޓީއީޔޫސް) އާއި 123669 ޖެނެރަލް ޖާގޯ (ފުރައިޓު ޓަންސް) އެތެރެކުރި އިރު 2019 ވަނަ އަހަރުވެސް އެހާ ވަރަށް އެތެރެކުރި ކަމަށެވެ.

ވަޖީހު ވިދާޅުވީ ފާއިތުވި ފަސް އަހަރަށް ބަލާއިރު ވެސް ކޮވިޑުގެ ދެ އަހަރު ދުވަހަށް ފަހު ވެސް ކާގޯ އިތުރުވި އަދަދަށް މާބޮޑު ބަދަލެއް ނާންނަ ކަމަށެވެ. އެހެންކަމުން ރާއްޖޭގެ އިގުތިސާދަށް މާބޮޑު ދިރުމެއް އައިސްފާ ނުވާކަން ވަޖީހު ފާހަގަކުރެއްވިއެވެ.

"ނަމަވެސް ރައީސް ޑޮކްޓަރ މުޙައްމަދު މުޢިއްޒުގެ ވެރިކަމުގެ ފުރަތަމަ އަހަރުވެސް، ރާއްޖޭގެ އިގުތިސާދަށް ދިރުން އައިސްފައިވާކަން، ކަށަވަރު ކޮށްދެނީ، ނިމިދިޔަ އަހަރު ރާއްޖެ އައި ކާގޯގެ އަދަދު އެހެން އަހަރު ތަކާ އަޅާ ބަލާއިރު ބޮޑުތަނުން އިތުތު ވެފައިވާ ކަމުންނެވެ. ރައީސް ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ގިނަ ޕޮރޮޖެކުޓްތަކެއް 2025 ވަނަ އަހަރު ފެށިގެން ދިއުމުން ރާއްޖޭގެ އިގުތިސާދަށް ދުވަހަކުވެސް ނުލިބޭވަރުގެ ކުރިއެރުމެއް މިއަހަރު ލިބިގެން ދާނެކަން ޔަގީނެވެ." ވަޖީހު ވިދާޅުވިއެވެ.

އަދި މި އަހަރު އައި ކުރިއެރުމާއެކު ކުރިއަށް އޮތް ތަނުގައި ރާއްޖެ އަންނަ ކާގޯގެ އަދަދު ވަރަށްބޮޑު ތަނުން އިތުރުވެގެންދާނެކަމަށް ބެލެވޭކަމަށް އޭނާ ވިދާޅުވިއެވެ.

އެހެންވެ ޕްރޮޖެކުޓްތަކަށް ދަތިނުވާ ގޮތަށް ކާގޯ މެނޭޖްކުރުމަށްޓަކައި އެމްޕީއެލުން މިހާރު ތައްޔާރުވަމުންދާކަމަށް ވަޖީހު ވިދާޅުވިއެވެ.