ހައްޖަށް ދާން ކިއުގައި އެތައް ހާސް ބަޔަކު އެބަތިބި ކަަމަށް ހައްޖު ކޯޕަރޭޝަނުން ބުނެފި އެވެ.

ހައްޖު ކޯޕަރޭޝަނަށް ފައިސާ ދެއްކުމަށްފަހު، ހައްޖުގެ އަޅުކަން އަދާކުރުމަށް ދިގު އިންތިޒާރެއްގައި އެތައް ބަޔަކު ތިބުމުން އެ މައްސަލަ ހައްލުކުރަން ސަރުކާރުން ވެސް މިހާރުވަނީ އެކަމަށް ހައްލެއް ހޯދަން މަސައްކަތް ފަށާފައެވެ.

ހައްޖު ކޯޕަރޭޝަންގެ އޮފިޝަލަކު "ރަސް"އަށް މިއަދު ވިދާޅުވީ ހައްޖު ކިއުގައި 9000 އަށް ވުރެ ގިނަ މީހުން އެބަތިބި ކަމަށެވެ.

އެގޮތުން ގިނައިން ތިބީ 65 އަހަރުން މަތީގެ މީހުން ކަމަށް ވެސް އޮފިޝަލު ވިދާޅުވި އެވެ.

ހައްޖުގެ އަޅުކަން އަދާކުރަން ކޮންމެ އަހަރަކުވެސް ސައުދީން އެކި ވަރަށް ކޯޓާ ދޫކުރެ އެވެ. އެގޮތުން އެންމެ ފަހުން ހައްޖަށް ދާން ސައުދީން ރާއްޖެއަށް ދޫކުރީ ޖުމްލަ 1150 ކޯޓާ އެވެ.

އެހެންކަމުން ހައްޖަށް ދާން ކިއުގައި އެތައް އަހަރަކު ގިނަ ބަޔަކު މަޑުކުރަން ޖެހޭނެ ކަމަށް އަދިވެސް ލަފާކުރެވެ އެވެ.

މިމައްސަލައަށް ހައްލެއް ހޯދުމަށް ސަރުކާރުން އެންމެ ފުރަތަމަ އެޅި ފިޔަވަޅަކީ މީހުން ހައްޖަށް ގެންދިއުމާ ބެހޭ އުސޫލަށް ބަދަލު ގެނައުމެވެ. މި އުސޫލުގައި ވާގޮތުން އަލަށް ހައްޖުގެ އަޅުކަން އަދާކުރަން އެދޭ ފަރާތްތަކަށް އިސްކަންދިނުމާއެކު ހައްޖުގެ އަޅުކަން އަދާކޮށްފައިނުވާ ފަރާތްތަކުގެ ތެރެއިން ޢުމުރުން 65 އަހަރުން ފެށިގެން މަތީގެ ފަރާތްތަކަށް ކޮންމެ އަހަރަކު ހައްޖު ކޯޕަރޭޝަނުން ކަނޑައަޅާ ވަކި އިންސައްތައެއް ޚާއްސަކުރުން ވެސް ހިމެނެއެވެ.

ކުރިން ހައްޖުގެ އަޅުކަން އަދާކޮށްފައިވާ ފަރާތަކަށް އިތުރު ފުރުސަތެއް ދެވޭނީ، އެންމެ ފަހުން ޙައްޖުގެ އަޅުކަން އަދާކުރިތާ ހިޖުރީ ސަނަތުން ފަސް އަހަރުވުމުން ކަމަށް ވެސް ގެންނަން ނިންމާފައިވާ ބަދަލުތަކުގެ ތެރޭގައި ހިމަނާފައި ވެއެވެ.