މަސައްކަތުގެ މާހައުލަށް ދަރިވަރުން ހާނުވައި، މަސައްކަތުގެ މާހައުލަށް ނިކުންނަންވާއިރަށް ދާއިރާގައި ތަޖުރިބާ ހުރި ފަރާތްތަކާއެކު މަސައްކަތް ކުރުމުގެ ފުރުސަތު ހޯދައިދިނުމުގެ ގޮތުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން އިންތިޒާމްކޮށްގެން ކުރިއަށް ގެންދާ 'ބިނާވެހި' ޕްރޮގްރާމްގެ އިތުރު ބުރެއް ފަށައިފި އެވެ.

ސޯޅަ އަހަރާއި 21 އަހަރުގެ ކުދިންނަށް ހާއްސަކޮށްފައިވާ މި ޕްރޮގްރާމްގެ ތިން ވަނަ ބުރުގައި ހަ ދަރިވަރަކު މި ފަހަރު ބައިވެރިވި ކަމަށް އާރުޑީސީން ބުނެފައި ވެއެވެ.

އާރްޑީސީން ބުނީ ހަ މަސް ދުވަހަށް ކުރިއަށްގެންދާ މި ޕްރޮގްރާމްގެ ދަށުން ދަރިވަރުންނަށް ތަޖުރިބާކާރުންނާއިއެކީ މަސައްކަތްކުރުމުގެ ފުރުޞަތު ލިބިގެންދާނެ ކަމަށެވެ.

އާރުޑީސީން ބުނީ އެ ޕްރޮގްރާމްގައި ބައިވެރިވާ ކޮންމެ ފަރާތަކަށް 5000 ރުފިޔާގެ އެލަވެންސެއް ދޭނެ ކަމަށެވެ.

ބިނާވެހި ޕްރޮގްރާމްގެ ބައިވެރިންނަށް މަސައްކަތް ކުރެވޭނެ ދާއިރާތަކުގެތެރޭގައި އެޑްމިނިސްޓްރޭޝަން، ސެކިއުރިޓީ އެންޑް ސޭފްޓީ، އިންވެންޓްރީ، އައި.ސީ.ޓީ، ލޮޖިސްޓިކްސް، ޕްރޮޑަކްޝަން، އެޗް.އާރ ހިމެނެއެވެ. އޭގެ އިތުރުން ޕްރޮޖެކްޓް މެނޭޖްމަންޓް، ޕްރޮޖެކްޓް އިމްޕްލިމެންޓޭޝަން، ސޭލްސް އެންޑް މާކެޓިންގ، ޕަބްލިކް ރިލޭޝަންސް ވެސް މި ޕްރޮގްރާމްގައި ހިމެނެއެވެ.