އުމްރާވެރިންތަކެއް ސައުދީއަށް ގެންގޮސް ހާލުގައި ޖެއްސި ގްރޫޕަށް އިސްލާމިކް މިނިސްޓްރީން ހަރުކަށި ފިޔަވަޅުތަކެއް އަޅައިފި އެވެ.

އުމްރާއަށް ގޮސް ތާށިވީ އަލްހިޖްރަ ކިޔާ ކުންފުންޏެއްގެ ހަވާލުގައި ދިޔަ ބައެކެވެ. އޭގެ ތެރޭގައި 24 މީހަކު ހިމެނޭއިރު ތިން ކުޑަކުދިން ވެސް ހިމެނެ އެވެ.

އިސްލާމިކް މިނިސްޓްރީން މިއަދު ނެރުނު ބަޔާނުގައި ބުނީ އުމްރާވެރިން ތާާށިވީ އެ މީހުން ދެއްކި ފައިސާ އެ ގްރޫޕުން އެހެން ކަންކަމަށް ބޭނުންކުުރުމުން ކަމަށެވެ. އެއާއެކު އެ އުމްރާވެރިން މައްކާއިން ރާައްޖެއަށް އަންނަން ޓިކެޓްވެސް ނަގާފައި ނުވާ ކަމަށާއި އެކަންކަމަށް އެ ގްރޫޕުން އިއުތިރާފްވެސް ވެފައިވާ ކަމަށް މިނިސްޓްރީން ބުނެފައި ވެއެވެ.

އިސްލާމިކް މިނިސްޓްރީން ބުނީ ހާލުގައި ޖެހުނު 24 މީހުންގެ ތެރެއިން 23 މީހުން މިހާރު ތިބީ ހައްޖު ކޯޕަރޭޝަންގެ ބެލުމުގެ ދަށުގައި ކަމަށެވެ.

އެހެންވެ އުމްރާއަށް މީހުން ގެންދިޔުމާބެހޭ އުސޫލާ އަލްހިޖްރަ ގްރޫޕުން ހިލާފުވެފައިވާތީ އެ ގްރޫޕް 100،000 ރުފިޔާއިން ޖޫރިމަނާކޮށް ގިނަ ފިޔަވަޅުތަކެއް އަޅާފައިވާ ކަމަށް މިނިސްޓްރީން ބުނެފައި ވެއެވެ.



އެގޮތުން އެ ގްރޫޕަށް ދީފައިވާ ހުއްދަވެސް ހިފަހައްޓައި އެ ގްރޫޕްގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަނުދިނުމަށް ނިންމާފައިވާ ކަމަށް މިނިސްޓްރީން ބުނެފައި ވެއެވެ.

އޭގެ އިތުރުން ހާލުގައި ޖެއްސި އުމްރާވެރިން ގެނައުމަށް ކުރި ހަރަދު ގްރޫޕްގެ އަތުން ނަގަން ވެސް ވަނީ ނިންމައިފަ އެވެ.

އެ މައްސަލަ ތަހުގީގުކުރަން އިސްލާމިކް މިނިސްޓްރީން މިހާރު ވަނީ ފުލުހުންނަށް ވެސް ހުށަހަޅައިފަ އެވެ.