މިއަދުން ފެށިގެން މުޅި ރާއްޖެއަށް މޫސުން ގޯސްވާނެ ކަމަށް ލަފާކޮށްފައިވާތީ ފެނަކައިއިން ވެސް ރަށްރަށުގައި އިމެޖެންސީ ރެސްޕޮންސް ޓީމުތައް އެކުލަވާލައިފި އެވެ.

މެޓް އޮފީހުން އިއްޔެ ބުނީ މިއަދުން ފެށިގެން މި މަހުގެ 18 އާ ހަމައަށް މުޅި ރާއްޖެއަށް ބޯކޮށް ވިއްސާރަކުރާނެ ކަމަށެވެ. އެހެންވެ ރައްކާތެރިކަމުގެ ފިޔަވަޅުތައް އެޅުމަށް މެޓް އޮފީހުން އޮތީ އިލްތިމާސްވެސްކޮށްފަ އެވެ.

އެހެންވެ ފެނަކައިން މިއަދު ނެރުނު ބަޔާނުގައި ބުނީ މެޓްގެ ލަފަޔާއެކު މޫސުން ގޯސްވެ ދިމާވެދާނެ ކަންކަމަށް ދުރާލާ ތައްޔާރުވުމަށް ފެނަކައިގެ ބުރާންޗުތަކުގައި އެކުލަވާލައިފައިވާ ކުއްލި ހާލަތްތަކަށް އިޖާބަދޭ ޓީމުތައް މިހާރު ތިބީ ތައްޔާރީ ހާލަތުގައި ކަމަށެވެ.

އެގޮތުން ފެނަކައިން ހިދުމަތް ދޭ 151 ރަށުގައި ޓީމުތައް އެކުލަވާލައިފައިވާ ކަމަށް ވެސް ފެނަކައިން ބުނެފައި ވެއެވެ.

"މި ޓީމުތަކުގައި ޖުމްލަ 2311 މެމްބަރުން ހަރަކާތްތެރިވަމުންދާކަން ވެސް ފާހަގަ ކުރަމެވެ. އެހެންކަމުން މިފަދަ ކޮންމެ ހާލަތެއްގައި ވެސް ރައްޔިތުންނާ ގާތުން ރައްޔިތުންނާ އެހީތެރިކަން ފޯރުކޮށްދިނުމުގައި ދެމިތިބޭނެ ކަމުގެ ޔަގީންކަން އަރުވަމެވެ." ފެނަކައިން ނެރުނު ބަޔާނުގައި ބުނެފައި ވެއެވެ.