ޔޫއޭއީއާއި ތައިލެންޑުން މިއަދުން ފެށިގެން ޢާސަންދައިގެ ހިދުމަތް ދޭން ފަށައިފި އެވެ.

އާސަންދަ ކުންުފުނިން މިއަދު ބުނީ އެ ދެ ގައުމުން އާސަންދަ ލިބޭނީ އާސަންދައިގެ ދަށުން ހިދުމަތް ދިނުމަށް އެމްޕެނަލްވެފައިވާ ހޮސްޕިޓަލްތަކުން ކަމަށެވެ.

އެ ހޮސްޕިޓަލްތަކަށް ހިދުމަތް ދިނުމަށް ފޮނުވާނީ ހުސްނުވާ އާސަންދަ ސްކީމް ހިންގުމުގެ ގަވާއިދުގެ ދަށުން މިހާރުވެސް ރާއްޖެއިން ބޭރުގެ ހޮސްޕިޓަލްތަކުން ހިދުމަތް ދިނުމަށް އަމަލުކުރާ ނިޒާމުގެ ތެރެއިންކަމަށް ވެސް އާސަންދައިން ބުނެފައި ވެއެވެ.

ޔޫއޭއީއާއި ތައިލެންޑްގެ ހޮސްޕިޓަލުތަކަށް ބަލި މީޚުން ރިފާކުރާ އިރު އިސްކަން ދޭނެ އުސޫލުތައް ވެސް އާސަންދައިން މިއަދު ވަނީ ހާމަކޮށްފަ އެވެ.

އެގޮތުން ފުރަތަމަ އިސްކަން ދޭނީ ކިޑްނީ ޓްރާންސްޕްލާންޓް ކުރުމަށް ބޭނުންވާ ބަލިމީހުންގެ ތެރެއިން އާއިލާގެ ތެރެއިން ކިޑްނީ ޑޮނޭޓްކުރާނެ ފަރާތެއް ނުލިބުމުގެ ސަބަބުން ކިޑްނީ ޓްރާންސްޕްލާންޓް ނުކުރެވި އެކަމުގެ ވޭން ތަޙައްމަލް ކުރަމުންދާ ފަރާތްތަކަށް ކަމަށް އާސަންދައިން ބުނެފައި ވެއެވެ.

އެއަށް ފަހު ދެން ބަލި މީހުން ރިފާ ކުރުމުގައި އެންމެ ބޮޑަށް އިސްކަން ދޭނީ ރާއްޖެ، އިންޑިޔާ ނުވަތަ ސްރީލަންކާގެ މަރުކަޒެއް މެދުވެރިކޮށް، އެތައް ފަހަރެއްގެ މަތިން ފަރުވާދެވުނު ނަމަވެސް އެފަރާތެއްގެ ބަލީގެ ހާލަތަށް ކުރިއެރުމެއް ނުލިބި، ބަލި ތަހައްމަލު ކުރަމުންދާ ފަރާތްތަކަށް ކަމަށް ވެސް އާސަންދައިން ބުނެފައި ވެއެވެ.

"އެފަދަ ފަރާތްތަކަށް ކަމާބެހޭ ޑޮކްޓަރުންގެ ޓީމްގެ ފަންނީ ލަފައާއެކު ބަލިމީހާ ރިފަރ ކުރާނެ މަރުކަޒު މި ކުންފުނިން ކަނޑައަޅާ އެފަރާތްތަކަށް ބޭނުންވާ ބޭސްފަރުވާއަށް އެހީ ފޯރުކޮށްދެވޭނެއެވެ." އާސަންދައިން ނެރުނު ބަޔާނުގައި ބުނެފައި ވެއެވެ.