އޮޅުވާލައިގެން ޕާޓީތަކަށް މީހުން ވައްދާ މައްސަލައަށް ހައްލެއް ގެނައުމަށްޓަކައި ޕާޓީތަކަށް މީހުން ވެއްދުން ވަގުތީގޮތުން މެދުކަނޑާލާފައިވާކަމަށް އިލެކްޝަންސް ކޮމިޝަނުން ބުނެފިއެވެ.

އެ ކޮމިޝަނުން މިރޭ ނެރުނު ބަޔާނެއްގައި ބުނީ، ސިޔާސީ ޕާޓީތަކަށް މެންބަރުން ވެއްދުމުގެ ނިޒާމު ހަރުދަނާކޮށް ޑިޖިޓަލް ނިޒާމަކަށް ބަދަލުކުރުމަށް މިހާރު ބޭނުންކުރަމުން އަންނަ "ސިމެދަ" ޕޯޓަލް މެދުވެރިކޮށް ފޯމު ހުށަހެޅުން 2025 ޖެނުއަރީ 30 ގެ ނިޔަލަށް ހުއްޓާލަން އެ ކޮމިޝަނުން ނިންމާފައިވާ ކަމަށެވެ.

މިގޮތަށް ނިންމިކަމަށްވިޔަސް "މައި ޕޯޓަލް" މެދުވެރިކޮށް، ޕާޓީން ވަކިވުމުގެ ހިދުމަތް މެދުނުކެނޑި ކުރިއަށް ދާނެކަމަށް އެ ކޮމިޝަނުން ވަނީ ބުނެފައެވެ.

އިލެކްޝަނުން މިފަދަ ނިންމުމެއް ނިންމާފައި މިވަނީ، ވެރިކަންކުރާ ޕީއެންސީއަށް އޮޅުވާލައިގެން ގިނަ އަދަދެއްގެ މީހުން ވައްދާފައިވާކަމުގެ ތުހުމަތު ކުރެވި އެ މައްސަލަ ހޫނުވެފައިވާ ދަނޑިވަޅެއްގައެވެ. ހާއްސަ ގޮތެއްގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު (ފިއްޓޭ)އަށް ނޭނގި ޕީއެންސީއަށް އޭނާ ބަދަލު ކޮށްފައިވާ މައްސަލަ ވަނީ އިލެކްޝަނުން ވެސް ބަލަން ފަށާާފައެވެ.

އިލެކްޝަންސް ކޮމިޝަނުން އިއްޔެ ބުނެފައިވަނީ، އޮޅުވާލައިގެން ސިޔާސީ ޕާޓީތަކަށް މީހުން ވެއްދުން ހުއްޓުވޭނީ ޕާޓީތަކަށް ވަނުމުގެ ކަންކަން އީފާސް މެދުވެރިކޮށް ކުރެވިގެން ކަމަށެވެ.