ފުުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފަންޑުތަކަށް އެ އެސޯސިއޭޝަންގެ ކުރީގެ ވެރިޔާ ބައްސާމު އަދީލް ޖަލީލު ހިޔާނާތްތެރިވި މައްސަލައާ ގުޅިގެން އަމީން ކޮންސްޓްރަކްޝަން ޕްރައިވެޓް ލިމިޓެޑްގެ މައްޗަށް ފީޖީ އޮފީހުން ދައުވާ އުފުލައިފިއެވެ.

އެގޮތުން އަމީން ކޮންސްޓްރަކްޝަންގެ މައްޗަށް ދައުވާ އުފުލާފައިވަނީ އަމީން އެވެނިއުގެ އެޕާޓްމެންޓެއް ގަތުމަށް ބައްސާމު ދިން ޗެކުގައިވާ ފައިސާއަކީ އެފްއޭއެމްގެ ފައިސާކަން އެނގިހުރެ އެ ކުންފުނިން އެ ފައިސާ ބަލައިގަތް ކަމަށް ތުހުމަތު ކުރެވޭތީއެވެ.

މީގެ އިތުރުން އެ ފައިސާއަކީ ޑޮލަރު ގަތުމުގެ މުއާމަލާތެއް ކަމަށް ބަޔާންކޮށް، ބޭންކް އޮފް ސިލޯނަށް ސިޓީއެއް ފޮނުވައި، އެ ފައިސާއަށް ވާ ދިވެހި ރުފިޔާ އެފްއޭއެމަށް ނަގުދު ފައިސާއިން ދީފައިވާކަން ދެއްކުމަށް އަމީން ކޮންސްޓްރަކްޝަންގެ ނަމުގައި ކޭޝް ވައުޗަރުތަކެއް ތައްޔާރު ކުރި ކަމަށްވެސް ދައުވާގައި ބުނެފައި ވެއެވެ. ނަމަވެސް އެ ފައިސާ އަށްވާ ދިވެހި ރުފިޔާ އެ ކުންފުނިން ދައްކާފައި ނުވާ ކަމަށްވެސް ދައުވާގައި ފާހަގަ ކޮށްފައި ވެއެވެ.

މި މައްސަލަ ކޯޓަށް ހުށަހަޅާފައިވަނީ މިދިޔަ އާދީއްތަ ދުވަހުއެވެ. ޕީޖީ އޮފީހުން ކުރި ދައުވާގައި ބުނާ ގޮތުގައި ބައްސާމް އޭނާގެ އެކައުންޓަށް އެފްއޭއެމްގެ ފައިސާއިން 1،919،950 ޑޮލަރު ޖަމާ ކުރުމަށްފަހު އަމީން އެވެނިއުގެ އެޕާޓްމެންޓެއް ގަތުމަށް އެ ފައިސާގެ ތެރެއިން 1،000،000 ޑޮލަރު ނަގާފައި ވެއެވެ.

މި މައްސަލާގައި އެފްއޭއެމަށް ލިބުނު ގެއްލުމުގެ ބަދަލުގެ ގޮތުގައި ޖުމުލަ 1،000،000 ޑޮލަރު ނަގައިދިނުމަށް ޕީޖީ އޮފީހުން ވަނީ ކްރިމިނަލް ކޯޓަށް ހުށަހަޅާފައެވެ.

އަދި އަމީން ކޮންސްޓްރަކްޝަންގެ މި އަމަލުގެ ސަބަބުން ބައްސާމް ހޯދައި ލިބިގަނެ ބޭނުން ކުރަމުންގެންދިޔަ އަމީން އެވެނިއުގެ ދެ އެޕާޓްމެންޓު، 1205 އަދި 1206 ދައުލަތަށް ނަގައިދިނުމަަށްވެސް ޕީޖީ އޮފީހުން އެދިފައި ވެއެވެ.