މާލެ އާ ތިލަަފުއްޓާ ދެމެދު ބުރިޖު ތަނބުތައް ޖަހާތީ ބަންދު ކުރެވިފައިވާ ސަރަހައްދުތަކުން ދަތުރު ނުކުރުމަށް އިލްތިމާސް ކޮށްފިއެވެ.

ކޮންސްޓްރަކްޝަން މިނިސްޓްރީއިން އެކްސްގައި ހިއްސާ ކުރި ޕޯސްޓެއްގައި ބުނެފައިވަނީ މާލެ-ތިލަފުށި ލިންކުގެ މަޝްރޫއުގެ މަސައްކަތްތައް މިހާރު ކުރިއަށްދާތީ އެހީސާބުގެ ކަނޑުގެ ޗެނަލްތައް ބަންދު ކޮށްފައިވާ ކަމަށެވެ.

އެގޮތުން ބަންދު ކުރެވިފައިވާ ޗެނަލްތަކުގެ ތެރޭގައި ގުޅިފަޅު-ތިލަފުށި ޗެނަލް، މާލެ-ވިލިމާލެ ޗެނަލް އަދި ވިލިމާލެ-ގުޅިފަޅު ޗެނަލް ހިމެނެއެވެ.

އެ އިދާރާއިން ބުނެފައިވަނީ ކަނޑުގައި ދުއްވާ އުޅަނޑުފަހަރު އެސަރަހައްދުގައި ދުއްވުމަކީ ރައްކާތެރި ކަމެއް ނޫން ކަމަށެވެ. އަދި އެހެންވެ، މި ޗެނަލްތަކުން ދަތުރު ނުކުރުމަށް އެ އިދާރާއިން ވަނީ އިލްތިމާސް ކޮށްފައެވެ.

މާލެ-ތިލަފުށި ލިންކް މަޝްރޫޢުގެ މަސައްކަތަށް ގުޅިފަޅު-ތިލަފުށި ޗެނަލް، މާލެ-ވިލިމާލެ އަދި ވިލިމާލެ-ގުޅިފަޅު ޗެނަލްތައް މިހާރުވެސް ވަނީ ބަންދުކުރެވިފައެވެ. އެގޮތުން ކަނޑު އުޅަނދުފަހަރު މި ސަރަހައްދުތަކުން ދަތުރުކުރުން ރައްކާތެރިކަމަކަށް ނުވާތީ، މި ޗެނަލްތަކުން ދަތުރު ނުކުރަން… pic.twitter.com/2RLmgnL72e

— Ministry of Construction, Housing & Infrastructure (@MoCImv) January 21, 2025

ކުރީ ސަރުކާރުން ފެށި މާލެ، ވިލިމާލެ، ގުޅިފަޅު އަދި ތިލަފުށި ބުރިޖަކުން ގުޅާލުމުގެ މަޝްރޫއު މިހާރު ބާރަށް ކުރިއަށްދާއިރު އެ މަސައްކަތުގެ ތެރެއިން މާލެއާއި ވިލިމާލެއާއި ދެމެދު ގުޅުވާލާބައިގެ ބޮޑު ބައެއް މިހާރު ވަނީ ނިމިފައެވެ.

ކުރީ ސަރުކާރުގައި ގިނަ ދުވަސްތަކެއް ވަންދެން މަސައްކަތް ހުއްޓިފައި އޮތްނަމަވެސް، މި ސަރުކާރު ވެރިކަމާ ހަވާލުވުމަށްފަހު ބުނެފައިވަނީ 2026 ވަނަ އަހަރުގެ ނިޔަލަށް ބުރިޖުގެ މަސައްކަތް ނިންމާލެވޭނެކަމަށް ލަފާކުރެވޭކަމަށެވެ.