ވެރިކަންކުރާ ޕީޕަލްސް ނޭޝަނަލް ކޮންގްރެސް ޕީއެންސީގެ މެންބަރުންގެ ޢަދަދު 68 ހާހަށް އަރައި މިހާރު އުވާލުމަށް ނިންމާފައިވާ ޕީޕީއެމްގެ މެންބަރުންގެ ޢަދަދު 12 ހާހަށް ވެއްޓިއްޖެއެވެ.

އިލެކްޝަންސް ކޮމިޝަނުން މިއަދު ޢާއްމު ކޮށްފައިވާ ސިޔާސީ ޕާޓީތަކުގެ ދަފްތަރުގެ އެންމެ ފަހުގެ އަދާހަމަ ދައްކާގޮތުން ވެރިކަންކުރާ ޕީއެންސީގައި މިވަގުތު ތިބީ 68968 މެންބަރުންނެވެ. މިއީ މިދިޔަ ޖުލައިމަހުގެ ނިޔަލަށް ޕީއެންސީގައި ތިބި 28 ހާސް މެންބަރުންނާ އަޅާބަލާއިރު ވަރަށް ބޮޑު ކުރިއެރުމެކެވެ.

ޕީއެންސީގެ މެންބަރުންގެ ޢަދަދު ބޮޑުތަނުން މަތިވެފައިވާއިރު އެޕާޓީގެ ކޯލިޝަން ޕާޓްނަރ ޕީޕީއެމްގެ މެންބަރުންގެ ޢަދަދު މިހާރު ވަނީ 12174 މެންބަރުންނަށް ތިރިވެފައެވެ. އީސީގެ ޖުލައިމަހުގެ އަދާހަމައިގައި އެޕާޓީގައި 34 ހާސް މެންބަރުން ތިބިކަމަށް ދައްކައެވެ.

އީސީގެ ދަފްތަރުގައި އިދިކޮޅު އެމްޑީޕީންވެސް 7 ހާހެއްހާ މެންބަރުން މަދުވެފައިވާކަމަށް ދައްކައެވެ. ކުރިން ބައިލައްކައަށް ވުރެ މަތީގައި އޮތް އެޕާޓީގެ މެންބަރުންގެ ޢަދަދު މިހާރުވަނީ 43755 އަށް މަދުވެފައެވެ.

ހަމައެއާއެކު 13 ހާސް މެންބަރުންނާއެކު ޖުމްހޫރީ ޕާޓީ ލިސްޓުގެ ތިންވަނައިގައި އޮތްއިރު ޢަދާލަތު ޕާޓީއާއި މޯލްޑިވްސް ޑިވެލޮޕްމަންޓް އެލަޔަންސްގައި ތިބީ 9 ހާސް މެންބަރުންނެވެ. ހަމައެހެންމެ މި ސަރުކާރުގެ ކޯލިޝަންގައި ހިމެނޭ އެމްއެންޕީގެ މެންބަރުންގެ ޢަދަދު މިހާރުވަނީ 6 ހާހަށް ތިރިވެފައެވެ.

އޭގެއިތުރުން ރައީސް ނަޝީދަށް ތާޢީދު ކުރާ ފަރާތްތަކުން އުފައްދާފައިވާ ޑިމޮކްރެޓްސްގެ މެންބަރުންގެ ޢަދަދަކީ 3667 އެވެ. އަދި ރައީސް މައުމޫންގެ އެމްއާރުއެމް އާއި ރައީސް ޔާމީންގެ ޕީއެންއެފް އާއި ކުރީގެ ނާއިބުރައީސް އަޙްމަދު އަދީބުގެ އެމްޓީޑީގެ މެންބަރުންގެ ޢަދަދު މިހާރުވަނީ 3 ހާހަށްވުރެ ދަށްވެފައެވެ.

އީސީން ޕާޓީތަކުގެ ދަފްތަރުގެ އެންމެފަހުގެ އަދާހަމަ ޢާއްމު ކޮށްފައިވާއިރު ދާދިފަހުން ވެރިކަންކުރާ ޕީއެންސީން ހިންގާފައިވާ މެންބަރޝިޕް ޑްރައިވްގައި މީސްމީހުންނަށް ނޭނގި އެމީހުންގެ ނަމުގައި އީސީއަށް ފޯމްތަކެއް ހުށައަޅާފައިވާ ކަމަށް އިދިކޮޅު އެމްޑީޕީން ވަނީ ތުހުމަތު ކޮށްފައެވެ.

ނަމަވެސް އެމްޑީޕީގެ ތުހުމަތުތައް ޕީއެންސީން ވަނީ ދޮގުކޮށްފައެވެ.