ރާއްޖޭގައި ސިޔާސީ ޕާޓީގެ ގޮތުގައި ރަޖިސްޓްރީ ކޮށްފައިވާ ޕާޓީތަކުގެ ދަފްތަރަށް ޝަކުވާ ހުށަހެޅުމުގެ ފުރުސަތު އިލެކްޝަން ކޮމިޝަނުން ހުޅުވާލައިފިއެވެ.

އިލެކްޝަނުން ކުރި އިއުލާނެއްގައި ބުނެފައިވަނީ، މިދިޔަ ޑިސެމްބަރުމަހުގެ 31 ވަނަ ދުވަހުގެ ނިޔަލަށް އެ ކޮމިޝަނުގެ ދަފްތަރަށް އަދާހަމަކުރެވިފައިވާ ސިޔާސީޕާޓީތަކުގެ މެމްބަރުންގެ ދަފްތަރާ ގުޅޭގޮތުން ޝަކުވާ ހުށަހެޅުމުގެ ފުރުސަތު މިހާރު ހުޅުވާލާފައިވާކަމަށެވެ. އެގޮތުން އިލެކްޝަނުން ވަނީ ދަފްތަރު ކުރެވިފައިވާ ފަރާތްތަކުގެ ޞައްޙަކަން ކަށަވަރުކުރުމަށްޓަކައި މެންބަރުންގެ މަޢުލޫމާތު ހިމެނޭ ލިސްޓު މިއަދު އާއްމުކޮށްފައެވެ.

ސިޔާސީ ޕާޓީގެ ދަފްތަރުގައި ހިމެނޭ މެމްބަރުންގެ ލިސްޓަށް ޝަކުވާ ހުށަހަޅަންޖެހެނީ ޕޯޓަލް މެދުވެރިކޮށެވެ. އިލެކްޝަނުން ބުނީ، ޝަކުވާ ޕޯޓަލް މެދުވެރިކޮށް އޮންލައިންކޮށް ހުށަހަޅާއިރު، ޝަކުވާ ހުށަހަޅަން އެދޭ މީހާގެ ދިވެހި ރައްޔިތެއްކަން އަންގައިދޭ، މުއްދަތު ހަމަނުވާ ރަސްމީ ލިޔުމެއްގެ ކޮޕީއެއް ހުށަހަޅަންޖެހޭނޭ ކަމަށެވެ. އަދި މީގެ އިތުރުން އިލެކްޝަންސް ކޮމިޝަނުގެ ޝަކުވާ ޕޯޓަލްގައިވާ ހުރިހާ މައުލޫމާތެއް ފުރިހަމަކޮށް ސާފު ފޮޓޯއެއް ހުށަހަޅަން ޖެހޭނެ ކަމަށެވެ.

އެ ކޮމިޝަނުން ބުނީ ޝަކުވާ ހުށަހެޅުމުގެ އެންމެ ފަހު ތާރީހަކީ އަންނަ ފެބްރުއަރީމަހުގެ ދިހަ ވަނަ ދުވަސް ކަމަށެވެ.

އިލެކްޝަނުން ސިޔާސީޕާޓީތަކުގެ މެމްބަރުންގެ ދަފްތަރަށް ޝަކުވާ ހުށަހެޅުމުގެ ފުރުސަތު ހުޅުވާލާފައިމިވަނީ، ވަގު ފޯމްތަކެއް ފުރައިގެން ޕީއެންސީއަށް މީހުން ވެއްދުމުގެ މައްސަލަތަކެއް ފެންމަތިވެފައިވާ ދަނޑިވަޅެއްގައިކަން ފާހަގަ ކުރެވެއެވެ.