ކުރީގެ ރައީސް އަބްދުﷲ ޔާމީން އިސްކޮށް ހުންނަވައިގެން އުފެއްދެވި ޕީޕަލްސް ނެޝަނަލް ފްރޮންޓް (ޕީއެންއެފް) ގައި މިހާރު 3،000 މެމްބަރުން ހަމަނުވާ ކަމަށް ދައްކައިފިއެވެ.

އިލެކްޝަންސް ކޮމިޝަނުން މިއަދު އާންމުކޮށްފައިވާ ތަފާސްހިސާބުތަކަށް ބަލާއިރު ޕީއެންއެފްގައި މިހާރު ތިބީ 2822 މެންބަރުންނެވެ. ނަމަވެސް، ސިޔާސީ ޕާޓީތަކުގެ ގާނޫނުގައި ބުނާގޮތުން ރާއްޖޭގެ ކޮންމެ ސިޔާސީ ޕާޓީއެއްގައި ވެސް އެންމެ މަދުވެގެން 3000 މެންބަރުން ހަމަވާންޖެހެއެވެ.

އަދި 3000 މެންބަރުން ހަމަނުވާ ޕާޓީތަކަށް ނޯޓިސް ދިނުމަށްފަހު އެފަދަ ޕާޓީތައް އުވާލުމަކީ ވެސް އެ ގާނޫނުން އިލެކްޝަންސް ކޮމިޝަނަށް ލިބިދޭ ބާރެކެވެ.

ޕީއެންއެފުން މެންބަރުންތަކެއް މަދުވެފައިވާއިރު އެ ޕާޓީގެ ގިނަ ބަޔަކަށް ނޭނގި ވެރިކަންކުރާ ޕީއެންސީއަށް ވައްދާފައިވާކަމުގެ ތުހުމަތު ޕީއެންއެފުން ވަނީ ކޮށްފައެވެ.

ނަމަވެސް، އިލެކްޝަންސް ކޮމިޝަނުން އާންމުކޮށްފައިވާ މައުލޫމާތަށް ބަލާއިރު މެންބަރުން އެންމެ ގިނަ ޕާޓީއެއްގެގޮތުގައި މިހާރު އޮތީ ޕީއެންސީއެވެ. އެ ޕާޓީގެ މެންބަރުންގެ އަދަދު މިހާރު 68،968 އަށް އަރައެވެ. ދެވަނައަށް މެންބަރުން އެންމެ ގިނައީ އެމްޑީޕީގައެވެ. އެ ޕާޓީގައި 43،755 މެންބަރުން އެބަތިއްބެވެ. ތިން ވަނަ އަށް އެންމެ ބޮޑު ޕާޓީއަކަށް އޮތް ޖުމްހޫރީ ޕާޓީގައި މިހާރު ތިބީ 13،826 މެންބަރުންނެވެ.