ރާއްޖޭގައި ޒުވާނުންކަމަށް މިހާރު ބަލާ އުމުރު 18 އަހަރުން 21 އަހަރަށް ބަދަލުކުރަން ސަރުކާރުން ރާވާފައިވާކަމުގެ ތުހުމަތު އެމްޑީޕީގެ ރައީސް ޢަބްދުالله ޝާހިދު ކުރައްވައިފިއެވެ.

އެމްޑީޕީން މިރޭ ބޭއްވި ކަންމަތީ ޖަލްސާއެއްގައި ވާހަކަ ދައްކަވަމުން ޝާހިދު ވިދާޅުވީ، ސިނގިރޭޓާ ގުޅޭ ކަންކަމުގައި 18 އަހަރާއި 21 އަހަރާ ދެމެދުގެ ޒުވާނުން ބަސްބުނަނީ ކިހާވަރަކަށްތޯ ސަރުކާރުން ބަލާ ކަމަށެވެ. އަދި އެ ކުދިން އެކަމުގައި އެއްޗެއް ނުބުނެ ތިބެއްޖެނަމަ މަޖިލީހުގައި ސަރުކާރަށް އޮތް ސުޕަރމެޖޯރިޓީ ބޭނުންކޮށްގެން ރާއްޖޭގައި ވޯޓުލެވޭ ހަގު އުމުރަކީ 21 އަހަރަށް ހަދާނެކަމަށް ޝާހިދު ވިދާޅުވިއެވެ.

“ޒުވާނުން މިކަމުގައި ބަސް ނުބުނެ ތިބެއްޖެނަމަ ދެން އަންނަން އޮތީ ރައްޔިތުންގެ މަޖިލީހުގައި މިއަދުގެ ސަރުކާރަށް މިއޮތް ސުޕަރމެޖޯރިޓީ ބޭނުންކޮށްގެން ގާނޫނުއަސާސީއަށް އެބޭފުޅުން ގެންނަން ނިންމާފައިވާ ނިންމުން، އެއީ މަޖިލީހުގެ މެންބަރުކަން ކުރެވޭނީ 21 އަހަރު ފުރިގެންކަމަށް، ވޯޓު ލެވޭނީ 21 އަހަރު ފުރިގެން ކަމަށް ގާނޫނުއަސާސީ ބަދަލުކޮށްލުން. ސިނގިރެޓާއި ގުޅޭގޮތުން މި ކުރެއްވި ކަމަކީ ވަކަރަށް ޖަހާލުން.” ޝާހިދު ވިދާޅުވިއެވެ.

ޝާހިދު ވިދާޅުވީ، ޖިނާއީ ކަންކަމުގައި 18 އަހަރުވުމުން ޒިންމާ އުފުލަންޖެހޭގޮތަށް އޮންނައިރު، ސިނގިރޭޓެއް ގަތުމުގެ ހައްގު އެމީހުނަށް ނޯންނަކަމަށެވެ. އަދި އެއީ ސިނގިރޭޓެއް ގަނެ އެއަށް ޒިންމާވެވޭވަރުގެ ތަސައްރަފު ފުދިފައިވާ މީހެއްކަމަށް ސަރުކާރުން ނުބަލާކަމަށެވެ. ޝާހިދު ވިދާޅުވީ އެއީ ސަރުކާރުން ރާވައިގެން އެނގިތިބެ، ޒުވާނުންކަމަށް ބަލާ އުމުރު 21 އަހަރަށް ބަދަލު ކުރުމަށް ކުރާ ކަމެއްކަމަށެވެ.

ޝާހިދު މިހެން ވިދާޅުވެފައިވާއިރު ސަރުކާރުންވަނީ ސިނގިރޭޓު ގަނެވިއްކޭ އުމުރަކީ 21 އަހަރުކަމަށް ކަނޑައަޅާފައެވެ. ސަރުކާރުން ބުނާގޮތުގައި މިކަންކުރީ ދުންފަތުގެ ނުބައި އަމަލުގައި ޖެހޭ ޒުވާނުން މަދުކުރުމުގެ ނިޔަތުގައެވެ.