މިދިޔަ އަހަރު އެސްޓީއޯއަށް 15 ބިލިއަން ރުފިޔާގެ އާމްދަނީ ލިބިފައިވާ ކަމަށް އެ ކުންފުނީގެ ހަތަރު ވަނު ކުއާޓާގެ ރިޕޯޓުން ދައްކައިފި އެވެ.

އެ ރިޕޯޓުން ދައްކާގޮތުން އެސްޓީއޯއަށް މިދިޔަ އަހަރު އެންމެ ބޮޑު އާމްދަނީއެއް ލިބުނީ މިދިޔަ އަހަރުގެ ފުރަތަމަ ކުއާޓާގަ އެވެ.

އެގޮތުން މިދިޔަ އަހަރުގެ ފުރަތަމަ ކުއާޓާގައި އެސްޓީއޯއަށް 4.5 ބިލިއަން ރުފިޔާގެ އާމްދަނީ ލިބުނުއިރު ހަތަރުވަނަ ކުއާޓާގައި ލިބުނީ 3.8 ބިލިއަން ރުފިޔާގެ އާމްދަނީ އެވެ. އަދި އަނެއް ދެ ކުއާޓާގެ އާމްދަނީއާއެކު ޖުމްލަ 15.3 ބިލިއަން ރުފިޔާގެ އާމްދަނީ މިދިޔަ އަހަރު އެސްޓީއޯ އަށް ލިބުނެވެ.

ނަމަވެސް މިދިޔަ އަހަރު ލިބުނު އާމްދަނީ 2023 ވަނަ އަހަރާ އަޅާބަލާއިރު އެއް ބިލިއަން ރުފިޔާ މަދެވެ. 2023 ވަނަ އަހަރު އާާމްދަނީގެ ގޮތުގައި 16.3 ބިލިއަން ރުފިޔާ ލިބިފައި ވެއެވެ.

ޓެކްސްތަކާއި އަދި އެހެނިހެން ހަރަދުތައް ކެނޑުމަށް ފަހު މިދިޔަ އަހަރު އެސްޓީއޯއަށް ލިބުނު ފައިދާގެ އަދަދުވެސް އޭގެ ކުރީ އަހަރާ އަޅާ ބަލާއިރު ވަނީ ދަށްވެފަ އެވެ.

އެގޮތުން 2023 ވަނަ އަަހަރު ޓެކްސްއާ ހަރަދުތައް ކެނޑުމަށް ފަހު 818 މިލިއަން ރުފިޔާ ލިބުނު އިރު މިދިޔަ އަހަރު ލިބުނީ 717 މިލިއަން ރުފިޔާ އެވެ.