ދިވެހި ދަޢުލަތުގެ ދިފާޢީ ބާރުގެ އެންމެ އިސްފަރާތްތައް ހައްޔަރުކުރުމަށް ޕީއެންސީގެ ލީޑަރ އަބްދުއްރަޙީމް އަބްދުﷲ (އަދުރޭ) ގޮވާލައްވައިފިއެވެ.

އިދިކޮޅު ކޯލިޝަނުން ހޮނިހިރު ދުވަހު ހަވީރު ބޭއްވި ޖަލްސާގައި އަދުރޭ ވިދާޅުވީ، ދިވެހި ޤައުމާއި ދިވެހި ރައްޔިތުން ސަލާމަތް ކޮށްދިނުމުގެ އެންމެ ބުރަ މަސްއޫލިއްޔަތަކާއި، އެންމެ ބޮޑު ޒިންމާއެއްއެޅިފައިއޮތް ބަޔަކީ ދިވެހި ރާއްޖޭގެ ސަލާމަތީ ޚިދުމަތްތައް ކަމަށެވެ. އެގޮތުން ސަލާމަތީ ޚިދުމަތްތަކުން ހުވާކޮށްގެން ތިބީ މާތްވެގެންވާ އިސްލާމްދީނާއި، ދިވެހިޤައުމު ޙިމާޔަތް ކުރުމަށް ކަމަށް އަބްދުއްރަޙީމް ވިދާޅުވިއެވެ. ތިންވަނައަށް ޙުރުމަތްތެރިކޮށް ހިތަން ޖެހެނީ ޤާނޫނު އަސާސީ އަށް ކަމަށާއި، ވެރިން ޙިމާޔަތް ކުރަން ޖެހެނީ އޭގެ ފަހުން ކަމަށް އަދުރޭ ވަނީ ވިދާޅުވެފައެވެ.

"ތިޔަބޭފުޅުން ތިޔަބޭފުޅުންގެ ވާޖިބު އަދާކޮށްދެއްވާ. ޝަމާލް ތިޔަބޭފުޅުންނަށް ކިޔަމަން ނުކުރެވޭ ކަމަށް ވަންޏާ ހައްޔަރުކޮށްފައިވެސް ޤައުމު ސަލާމަތް ކޮށްދެއްވާ. މާރިޔާ ހަތަރެސްފައިގަ ބިޑިއަޅާފަ ނަމަވެސް ޤައުމު ސަލާމަތް ކޮށްދެއްވާ. އެއީ ތިޔަބޭފުޅުންގެ ޒިންމާއަކީ. އެއީ ތިޔަބޭފުޅުންގެ ވާޖިބަކީ. އެއީ ތިޔަބޭފުޅުންގެ ދައުރަކީ." ޖޯޝާ ފޯރީގައި ވާހަކަ ދައްކަވަމުން އަދުރޭ ވިދާޅުވިއެވެ.

އަދުރޭ ވިދާޅުވީ ވެރިންވެސް ޤާނޫނު އަސާސީއާ ޚިލާފުވުމުން އެމީހުން ޙިމާޔަތްކުރަން ނުޖެހޭނެ ކަމަށެވެ. ނަމަވެސް ޤާނޫނު އަސާސީއާ ޚިލާފަށް ސަލާމަތީ ބާރުތަކުގެ ވެރިން ކުރެއްވި ކަމެއް އަދުރޭ ވިދާޅުވެފައެއް ނުވެއެވެ.

ސަލާމަތީ ޚިދުމަތްތަކުގައި ތިއްބެވި ސިފައިންނާއި ފުލުހުންނަށް މުސާރަދެނީ ރައްޔިތުންގެ ފައިސާއިން ކަމަށާއި، އެއީ ރައީސް ޞާލިޙްގެ ފައިސާއެއް ނޫން ކަމަށާއި، އަދި ސަގަރު ލުތުފީއާއި ސިއްކަގެ ފައިސާ ނޫން ކަމަށްވެސް އަދުރޭ ވިދާޅުވިއެވެ.

މީގެ އިތުރުންވެސް މިއަދުގެ ޖަލްސާގައި އަދުރޭ ވަނީ އެއްވެސް އަސްލެއްނެތް ފިތުނަވެރި ގިނަ ވާހަކަތަކެއް ދައްކަވައި ޤާނޫނާ ޚިލާފު ޢަމަލުތަކެއް ހިންގުމަށް ސަލާމަތީ ޚިދުމަތްތަކަށް ހިތްވަރު ލިބޭގޮތަށް ވާހަކަ ދައްކަވާފައެވެ. އެގޮތުން މާލޭގައި ހުރި ސަލްމާން މިސްކިތް ނުހުޅުވާ މިސަރުކާރުން ލަސްކުރަނީ އެއީ މިސްކިތަކަށް ވުމުން ކަމަށާއި، އެއީ ބުދުފައްޅިއެއް ނަމަ މިހާރު ހުޅުވައިފީސް ކަމަށް އަދުރޭ ވިދާޅުވިއެވެ.