މަސްވެރިކަމަށް ނިކުމެ އުޅުނު ދޯންޏެއްގެ ތެރެއަށް ޒުވާނަކު ވެއްޓިގެން އޭނާއަށް އަވަސް ފަރުވާ ދިނުމަށް ޙަރަކާތްތެރިވަމުންދާ ކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން ކޮށްފައިވާ ޓްވީޓެއްގައި ވަނީ އަވަސް ފަރުވާއަށް ގެނައުމުގެ މަސައްކަތް ކުރަމުންދަނީ ހއ. ތުރާކުނު ހުޅަނގު އުތުރުން 32 ނޯޓިކަލް މޭލު ބޭރުގައި މަސްވެރިކަން ކުރަން އުޅުނު "އަރާކުރި" ދޯނީގައި ހުރި އުމުރުން 32 އަހަރުގެ ޒުވާނެއް ކަމަށެވެ. އޭނާ އަކީ އެ ދޯނީގެ ފަޅު ވެރިއެއް ކަމަށާއި އޭނާ އަށް އަނިޔާ ވެފައި ވަނީ އެ ދޯނި ތެރެއަށް ވެއްޓިގެން ކަމުގައިވެސް އެމްއެންޑީއެފުން މަޢުލޫމާތު ދެއެވެ.

އެމްއެންޑީއެފް އިން ބުނީ މި ހާދިސާގެ ރިޕޯޓް އެމްއެންޑީއެފްއަށް ލިބިފައި ވަނީ މިއަދު މެންދުރު 1:31 އެހާކަންހާއިރު ކަމަށާއި އެމްއެންޑީއެފް ނޮދަން އޭރިޔާގެ ކޯސްޓްގާޑް ސޮކޮޑްރޮންއިން އެމީހާ ހއ. ހޯރަފުއްޓަށް ގެނައުމުގެ މަސައްކަތް މިހާރު ކުރަމުންދާ ކަމަށެވެ.

Ha.Thuraakunuge hulhangu uthurun 32nm beyrugai masverikan kuran ulhunu "Araakuri" dhoaneegai huri, 32 aharuge dhivehi falhuveriaku dhoani thereah vetti aniyaa vegen, MNDF Northern Area CG Squadron in harakaaiytheri vanee. Mi haadhisaage report libifaivanee miadhu 13:31 haairu pic.twitter.com/nOJaQEE4J7

— Maldives National Defence Force (@MNDF_Official) September 28, 2020

އެމީހާއަށް ލިބިފައިވަނީ ކޮންކަހަލަ އަނިޔާއެއް ކަމެއް އަދި ސާފުވެފައެއް ނުވެއެވެ.

މަސްވެރިކަން ކުރަން އުޅުމުގެ ތެރޭގައި ބޮޑެތި އަނިޔާތައް މަދުން ނަމަވެސް ދަނީ ލިބެމުންނެވެ. މިދިޔަ ހަފްތާގައިވެސް އެންއެންޑީއެފުން ވަނީ ދެ މަސްވެރިޔަކަށް އަނިޔާވެގެން ސިއްހީ އަވަސް ފަރުވާއަށް މާލެ ގެނެސްފައެވެ. އޭގެ ތެރޭގައި މަސްވެރިކަން ކުރަން އުޅުމުގެ ތެރޭގައި ލޮލަށް ބުޅިއެއް ހެރުނު މީހަކުވެސް ހިމެނެއެވެ.