މިއަހަރުގެ އޭލެވެލް އިމްތިހާން ފަށާނީ 26 އޭޕްރީލް ގައިކަމަށް އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ މުޙައްމަދު އިހުސާން ވިދާޅުވެއްޖެއެވެ.

އެޑިއުކޭޝަން މިނިސްޓްރީން މީގެ ކުރިން ބުނެފައިވަނީ، ކުރިންވެސް ތާވަލުކުރި ގޮތަށް މިއަހަރުގެ މޭ އަދި ޖޫންމަހު އޭލެވެލް އިމްތިހާނު އޮންނާނެކަމަށެވެ. އަދި އިމްތިހާނުގައި ބައިވެރިވާން ބޭނުންވާ ފަރާތްތަކުން މިމަހުގެ 11 ވަނަ ދުވަހުގެ ކުރިން އެޕްލިކޭޝަން ހުށަހެޅުމުގެ ފުރުޞަތު ހުޅުވާލާފައިވާކަމަށް އެޑިއުކޭޝަނުން ބުނެފައި ވެއެވެ.

އެކަމާގުޅިގެން މިއަދު ޑެޕިއުޓީ މިނިސްޓަރ އިހުސާން ވިދާޅުވެފައިވަނީ، ރާއްޖޭގައި އޮންނަ އޭލެވެލް އިމްތިހާނުގައި ދޭނީ އެޑެކްސެލްއިން ތައްޔާރުުކުރާ ޓެސްޓް ޕޭޕަރެއްކަމަށާއި، ސެޓްފިކެޓްވެސް ދޭނީ އެޑެކްސެލުން ކަމަށެވެ. އެހެންކަމުން އިމްތިހާން އޮންނާނީ އެޑެކްސެލުން ކަނޑައަޅާފައިވާ ތާވަލާއި އެއްގޮތަށް، އެ ތާރީޚް ތަކާއި އެއްގޮތަށް ކަމަށް އޭނާ ވިދާޅުވިއެވެ.

ކޯވިޑް-19އާ ގުޅިގެން މިދިޔަ އަހަރުގެ ނޮވެމްބަރުމަހު ބާއްވަން އުޅުނު އައިޖީސީއެސްއީއާއި އޭލެވެލް އިމްތިހާން އިނގިރޭސިވިލާތުން ކެންސަލްކުރުމާއެކު، ރާއްޖެއިން ވަނީ އެ ދެ އިމްތިހާނު މިއަހަރުގެ މެއި، ޖޫނަށް ފަސްކޮށްފައެވެ.

ކޯވިޑް-19ގެ ސަބަބުން 2020 ވަނަ އަހަރު ރާއްޖޭގެ ސްކޫލްތައް ގިނަ ދުވަސްތަކަކަށް ބަންދުކުރަން ޖެހުމުގެ ސަބަބުން 2020ވަނަ އަހަރާއި 2021 ވަނަ އަހަރުގެ އެކެޑެމިކް ކަލަންޑަރަށްވެސް އެޑިއުކޭޝަން މިނިސްޓްރީން ވަނީ ބޮޑެތި ބަދަލުތަކެއް ގެނެސްފައެވެ.