ބަންގްލަދޭޝްގެ ރައްޔިތެއް ކަމަށްވާ އަލަމްގީރާއިއެކު އެއްޖިންސުން ގުޅުން ހިންގި މީހުންގެ ވީޑިއޯތައް ބޭނުންކޮށްގެން ބްލެކްމެއިލް ކުރި މީހުން ހޯދުމަށް ފުލުހުންގެ ހާއްސަ އޮޕަރޭޝަނެއް ފަށައިގެން ކުރިއަށް ދާކަމަށް ފުލުހުންގެ އިދާރާއިން ބުނެފިއެވެ.

އަލަމްގީރާއިއެކު އެއްޖިންސުން ގުޅުން ހިންގި މީހުންގެ ވީޑިއޯތައް ލީކުކުރި މައްސަލާގައި ބަޔަކު ހައްޔަރު ކޮށްފައިވާކަމަށް އަޑުފެތުރިފައިވާތީ އެކަން ސާފު ކުރުމަށް، ފުލުހުންނާ ސުވާލު ކޮށްލުމުން، ފުލުހުންގެ މީޑިއާ އޮފިޝަލް "ރަސް އޮންލައިން" އަށް ވިދާޅުވީ، ގިނަ އަދަދެއްގެ ބައެއްގެ ވީޑިއޯ ބޭނުންކޮށްގެން ބްލެކްމެއިލް ކުރި މައްސަލައާއި ގުޅިގެން އޮޕަރޭޝަނެއް ފެށިގެން ކުރިއަށް ދާކަމަށެވެ.

އަދި އެ އޮޕަރޭޝަނާ ގުޅޭ އިތުރު މައުލޫމާތު، އޮޕަރޭޝަން ނިމުމުން ހިއްސާ ކުރައްވާނެކަމަށް މީޑިއާ އޮފިޝަލް ވިދާޅުވިއެވެ.

އެއްޖިންސުން ގުޅުން ހިންގި މައްސަލާގައި 40 ދައުވާއެއް އުފުލާފައިވާ އަލަމްގީރުގެ ލީކުވެފައިވާ ބަޔާނެއްގައި އޭނާ ބުނެފައިވަނީ، ކުރިން އޭނާ ގެންގުޅުނު ފޯނު ވަގަށް ނަގައިގެން، ވީޑިއޯތަކެއް ލީކު ކުރީ އެހެން ބައެއް ކަމަށެވެ. އަދި އެއީ އޭނާ އުޅުނު ގެއަށް ނިސްބަތްވާ ބައެއްކަމަށް އެ ބަޔާނުގައި ބުނެފައިވެއެވެ.

މި މައްސަލާގައި ބ. ދަރަވަންދޫއަށް ނިސްބަތްވާ ދެ މީހަކު ހައްޔަރު ކޮށްފައިވާކަމަށް މީސްމީޑިއާގައި މިއަދު ވަނީ އަޑު ފެތުރިފައެވެ.