އެއަރޕޯޓުން ހައްޔަރުކުރި އިންޑިއާ ދެމީހުން ޤައުމަށް ފޮނުވާލައިފިއެވެ.

ވެލާނާ އިންޓަނޭޝަނަލް އެއަރޕޯޓުގައި ޖާސޫސް ކުރަން އުޅުނު ކަމުގެ ތުހުމަތުގައި އޯގަސްމަހުގެ 29 ވަނަ ދުވަހު ފުލުހުން ހައްޔަރު ކޮށްފައިވާ އިންޑިއާ ދެމީހުންނަކީ އެއަރޕޯޓުގައި ސްޕައިކެމެރާތަކެއް ބަހައްޓައިގެން ވީޑިއޯކޮށް ޖާސޫސް ކުރަމުން ދާކަމަށް ފާހަގަ ކުރެވުނު ދެ މީހުންނެވެ. އެ ދެ މީހުން ބަންދުގައި ބަހައްޓަން ބޭނުންވެ ކުރިމިނަލް ކޯޓަށް ގެންދިޔުމުން އެ މީހުންގެ ބަންދަށް ކޯޓުން 10 ދުވަސް ޖަހައިދިނެވެ.

އެ ދެމީހުންގެ މައްސަލައިގެ އެންމެފަހުގެ އަޕްޑޭޓް "ރަސްއޮންލައިނަށް" ޙިއްސާކުރަށްވަމުން ފުލުހުންގެ މީޑިއާ އޮފިޝަލް މިއަދު ވިދާޅުވީ އެ ދެމީހުންގެ މައްޗަށް ޖިނާޢީ ތުހުމަތެއް އުފުލޭވަރުގެ ހެއްކާއި ޤަރީނާ ހޯދިފައިނުވާކަމަށެވެ.

"މި ދެމީހުން ވަނީ 8 ސެޕްޓެމްބަރ ގައި ބަންދުން ދޫކުރެވިފައި. އަދި ސެޕްޓެމްބަރ 9 ވަނަ ދުވަހު މި 2 މީހުން ވަނީ ރާއްޖެއިން ފޮނުވާލެވިފައި." ފުލުހުންގެ މީޑިއާ އޮފިޝަލް ވިދާޅުވިއެވެ.

އެ ދެބިދޭސީންނާ ގުޅޭ ގޮތުން ބޮޑެތި ތުހުމަތުތަކެއް ކުރައްވައި އެ މައްސަލައިގެ މައުލޫމާތު ރައްޔިތުންގެ މަޖިލީހަށް ހިއްސާކުރުމަށް މާވަށު ދާއިރާގެ ޕީއެންސީ މެމްބަރު މުހައްމަދު ސައީދު މިއަދު ވަނީ ރައްޔިތުންގެ މަޖިލީހަށް މައްސަލައެއްވެސް ހުށައަޅުއްވާފައެވެ. ނަމަވެސް ސަޢީދު ހުށަހެޅުއްވި ކުއްލި މައްސަލަ މަޖިލީހުން ވަނީ ބޭރުކޮށްލައިފައެވެ.

މައްސަލަ ހުށައަޅުއްވަމުން ސަޢީދު ވިދާޅުވީ އެހާދިސާ ހިނގުމުން އިންޑިއާގެ އޮފިޝަލެއް ރާއްޖެ އައިސް އެ ދެ މީހުން ދޫކޮށްލަން އެދިފައިވާ ކަމަށެވެ. އަދި އޭގެފަހުން ފުލުހުން ހާދިސާގެ ރިޕޯޓު ބަދަލުކޮށްފައިވާ ކަމަށް ސައީދު ތުހުމަތުކުރެއްވިއެވެ. ސައީދު ވިދާޅުވީ އެ މީހުން ވީޑިއޯ މެދުވެރިކޮށް އެއާޕޯޓުގެ ކަންކަން ލައިވްކުރިކަމުގެ ހެކި ފުލުހުން ކޯޓަށްވެސް ހުށަހަޅާފައިވާ ކަމަށެވެ.