މުސާރަ ދިނުން ލަސްވަނީ ބައެއް ސުކޫލުތަކުން ނުބައިކޮށް މުސާރަ ޝީޓް ހަދާފައިވާތީކަމަށް ތަޢުލީމާބެހޭ ވުޒާރާއިން ހާމަކޮށްފިއެވެ.

ތަޢުލީމާބެހޭ ވުޒާރާއިން ބުނީ މުސާރަ ދިނުން ލަސްވެފައިވަނީ ނޮދަން ސެންޓަރަލްގެ އަދި ނޮދަން ޒޯންގެ ސްކޫލްތަކުގައި ކަމަށެވެ. ނޮދަން ޒޯނުގައި ހިމެނެނީ ނ، ރ އަދި ބ އަތޮޅެވެ. ނޮދަން ޒޯންގައި ހިމެނެނީ ޅ، ކ، އއ، އދ، އަދި ވ އަތޮޅުގެ ސްކޫލްތަކެވެ.

ބަޖެޓް ވަކި ނުކުރާ ސްކޫލުތަކުގެ މުސާރަ ސެޕް ސިސްޓަމް ތެރެއިން ކުރުމަށް ފަށާފައިވަނީ ފާއިތުވީ މަހުއެވެ. އަދި މިގޮތަށް މުސާރަ ތައްޔާރު ކުރާނެގޮތުގެ މަޢުލޫމާތު މީގެންކުރިން ސްކޫލްތަކުގެ ބަޖެޓް ހައްދަވާ މުވައްޒަފުންނާ ހިއްސާ ކުރެވިފައިވާނެ ކަމަށް ތަޢުލީމާބެހޭ ވުޒާރާއިން މަޢުލޫމާތު ދީފައިވެއެވެ.

ނަމަވެސް، މިފަދަ ބައެއް ސްކޫލުތަކުން ސެލަރީ ޝީޓް ރަގަޅަށް ހަދާފައިނުވާތީ އާއި ބަންޑޭރި ޕޯޓަލް އަޕްޑޭޓްކޮށްފައިނުވާތީ، މި މަސައްކަތް ވަރަށް ލަސްވެފައިވާ ކަމަށް އެ މިނިސްޓްރީން ބުނެއެވެ.

"މުސާރަ ލައިވް ކުރުމުގެ މަސައްކަތަކީ ޒޯންގައި ހިމެނޭ ހުރިހާ ސްކޫލަކަށް އެއްކޮށް ކުރެވޭ ކަމަކަށް ވާތީ އެއް ސްކޫލްގެ ޝީޓް ލަސްވިއަސް މުޅި ޒޯންގައި ހިމެނޭ ހުރިހާ ރަށެއްގެ މުސާރަ ލަސްވޭ." މިނިސްޓްރީން ބުނެފައިވެއެވެ.

މިނިސްޓްރީން ބުނީ، މައްސަލަ ހުރި ސެލެރީ ޝީޓްތައް އިސްލާހު ކުރުމުގެ މަސައްކަތްތައް މިނިސްޓްރީގެ އެޗްއާރ ސެކްޝަނުން ކޮށް، އަންނަ އާދީއްތަ ދުވަހު އެ ދެ ޒޯނުގައި ހިމެނޭ ސްކޫލްތަކުގެ މުވައްޒަފުންގެ މުސާރަ ޖަމާކޮށްދޭނެ ކަމަށެވެ.