ތަޢުލީމީ ބިލާމެދު މަޝްވަރާ ކުރުމުގެ ފުރުސަތު ރައްޔިތުންގެ މަޖިލީހުން ނުލިބުނު ކަމަށް ބުނެ، ޓީޗާރސް އެސޯސިއޭޝަން އޮފް މޯލްޑިވްސްގެ ކަންބޮޑުވުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙަށް ހުށައަޅައިފިއެވެ.

ޓީޗަރުންގެ އެސޯސިއޭޝަނުން މިއަދު ބުނީ ތަޢުލީމުގެ ބިލަށް ކޮމެޓީ މަރުހަލާގައި މަޝްވަރާ ކުރުމުގެ ފުރުސަތު ރައްޔިތުންގެ މަޖިލީހުން އެ އެސޯސިއޭޝަނަށް ދީފައިނުވާ ކަމަށެވެ. އެހެންކަމުން މިބިލާއި ގުޅިގެން އެ އެސޯސިއޭޝަނުން ކަންބޮޑުވާ ކަންތައްތައް ރައީސުލްޖުމްހޫރިއްޔާއަށް ސިޓީއަކުން ދަންނަވާފައިވާނެ ކަމަށެވެ.

ތައުލީމުގެ ބިލް މިވަގުތު ދިރާސާކުރަމުން އަންނަނީ ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީންނެވެ. މި ބިލަށް އާންމުންގެ ހިޔާލު ހޯދުމަށް ދާދި ފަހުން ރައްޔިތުންގެ މަޖިލީހުގެ އިދާރާގައި ބައްދަލުވުމެއް ވެސް ބާއްވާފައިވެއެވެ.

ތަޢުލީމުގެ ބިލަށް ކޮމެޓީ މަރުހަލާގައި މަޝްވަރާ ކުރުމުގެ ފުރުސަތު ރައްޔިތުންގެ މަޖިލީހުން ލިބިފައިނުވާތީ، ބިލުގައި ކަންބޮޑުވުން ހުރިކަން ފާހަގަކޮށް ރައީސުލްޖުމްހޫރިއްޔާ އަށް ވާނީ ސިޓީއަކުން ދަންނަވާފައި@presidencymv @ibusolih @mvpeoplesmajlis @MohamedNasheed

— Teachers' Association of Maldives (@TAMaldives) July 25, 2020

ތައުލީމުގެ ބިލު މަޖިލީހަށް ހުށަހެޅުއްވީ ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒެވެ. އެ ބިލަކީ ގާނޫނުއަސާސީން ކަށަވަރުކޮށްދީފައިވާ އުނގެނުމުގެ ހައްގު އޭގެ އެންމެ ފުރިހަމަ ގޮތުގައި ލިބިދިނުމަށްޓަކައި ގާއިމުކޮށްދޭންޖެހޭ ގާނޫނީ އޮނިގަނޑު ގާއިމުކުރުމުގެ މަގްސަދުގައި ސަރުކާރުން ފޮނުވާފައިވާ ބިލެކެވެ.

ބިލުގައިވާ ގޮތުން އުމުރުން ހަތަރު އަހަރުން ފެށިގެން 16 އަހަރާ ދެމެދުގެ ކޮންމެ ކުއްޖަކީ ތައުލީމު ލާޒިމުވާ އުމުރުގެ ކުއްޖެކެވެ. ބިލުގައި ޕްރީ ސްކޫލް ތައުލީމާއި ސާނަވީ ތައުލީމާއި މަތީ ސާނަވީ ތައުލީމު ހިލޭ ކޮށްދިނުމުގެ އުސޫލުތައް ބަޔާން ކޮށްފައިވެއެވެ. އަދި ދަރިވަރުންގެ ހައްގުތަކާއި ބެލެނިވެރިންނާއި ޓީޗަރުންނާއި ސަރުކާރުގެ ޒިންމާތައް ވެސް އެ ބިލުގައި ބަޔާންކޮށްފައިވެއެވެ.