މި އަހަރުގެ އޮގަސްޓް މަހުގެ ނިޔަލަށް މަގުމަތީ އެކްސިޑެންޓްގެ 1907 މައްސަލައެއް ފުލުހުންގެ އިދާރާއަށް ހުށަހަޅާފައިވާ ކަމަށް އެ އިދާރާގެ ތަފާސްހިސާބުތަކުން ދައްކައިފި އެވެ.

ފުލުހުންގެ އިދާރާއިން ޢާއްމު ކޮށްފައިވާ ތަފާސްހިސާބުން ދައްކާގޮތުން މިއަހަރު އެއިދާރާއަށް ރިޕޯޓް ކޮށްފައިވާ އެކްސިޑެންޓްތަކުގެ ތެރެއިން 1،584 އެކްސިޑެންޓް ރިޕޯޓްކޮށްފައިވަނީ މާލެ ސަރަހައްދުންނެވެ.

އެގޮތުން މާލޭގައި ހިނގާފައިވާ 1،166 އެކްސިޑެންޓް ރިޕޯޓްކޮށްފައިވާއިރު، ހުޅުމާލޭގައި ހިނގި 413 އެކްސިޑެންޓެއް ފުލުހުންނަށް ރިޕޯޓްކޮށްފައިވެއެވެ. އަދި ވިލިމާލޭގައި 5 އެކްސިޑެންޓް ހިނގާފައިވާކަމަށް މިއަހަރު އޮގަސްޓްމަހުގެ ނިޔަލަށް ފުލުހުންނަށް ވަނީ ރިޕޯޓްކޮށްފައެވެ.

ތަފާސް ހިސާބުތައް ދައްކާ ގޮތުން މިދިޔަމަހު ފުލުހުންނަށް ރިޕޯޓް ކޮށްފައިވަނީ 218 އެކްސިޑެންޓެވެ. އަދި މިއަހަރުގެ މިހާތަނަށް އެންމެ ގިނަ އެކްސިޑެންޓް ރިޕޯޓްކޮށްފައިވަނީ މާޗު މަހު އެވެ. އެ މަހު އެކަނި 301 އެކްސިޑެންޓް ފުލުހުންނަށް ރިޕޯޓްކޮށްފައިވެ އެވެ.

މަގުމަތީގެ އެކްސިޑެންޓްތައް އިތުރުވެފައިވާއިރު އިއްޔެ ރޭ ހުޅުމާލޭގައި ސްޕޯޓްސް ކާރަކާއި ސައިކަލެއް ޖެހި ހިނގި އެކްސިޑެންޓުގައި 23 އަހަރުގެ ޒުވާނަކު ވަނީ ނިޔާވެފައެވެ. އަދި މިއަދު ހެނދުނު ހުޅުމާލޭ ދެވަނަ ފޭސްގައި ހިނގި އެކްސިޑެންޓުގައި އަނިޔާވި މީހާއަށް މިހާރު ދަނީ ހޮސްޕިޓަލްގައި ފަރުވާދެމުންނެވެ.

އެކަމާ ގުޅިގެން މަގުމަތީގެ ރައްކާތެރިކަން ކަށަވަރު ކުރުމަށްޓަކައި 8 ފިޔަވަޅެއް އެޅުމަށް ރައީސް ޑރ. މުޢިއްޒު ވަނީ ދަޢުލަތުގެ ކަމާބެހޭ އެންމެހާ އިދާރާތަކަށް އަންގަވާފައެވެ.