ހުޅުމާލޭގައި ގާއިމްކުރަމުންދާ ބުޅާ ފެސިލިޓީތަކަށް ގެންދާ ބުޅާތަކަށް ފަރުވާދިނުމަށް ޑޮކްޓަރަކާއި ވެޓެރިނަރީ ނަރުހުން ހޯދަން މާލެސިޓީ ކައުންސިލުން އިއުލާނު ކޮށްފި އެވެ.

މާލެ ސިޓީ ކައުންސިލުން ކުރި އިއުލާނުގައި ބުނީ ބުޅާ ފެސިލިޓީއަށް ގެންދާ ބުޅާތަކަށް ފަރުވާދިނުމަށް ޑޮކްޓަރަކާއި ދެ ނަރުހުން ބޭނުންވާ ކަމަށެވެ. ވެޓެރިނޭރިއަންއެއް ހޯދަން އިއުލާންކޮށްފައި ވަނީ 35،000ރ. ގެ މުސާރައެއް ލިބޭ ގޮތަށެވެ.

މި ފެސިލިޓީ އަށް ހޯދާ ވެޓެރިނަރީ ނަރުހުންގެ މުސާރައިގެ ގޮތުގައި ކަނޑައަޅާފައި ވަނީ 8،130ރ. އެވެ. އަދި މަސައްކަތް ކުރާ ކޮންމެ ދުވަހަކަށް ސާވިސް އެލަވަންސްގެ ގޮތުގައި 100ރ. ކަނޑައަޅާފައިވާ އިރު، އިތުރުގަޑީގައި މަސައްކަތް ކުރާނަމަ، މުސާރައިގެ 35 އިންސައްތަ ވެސް ލިބޭނެ ކަމަށް އިއުލާނުގައި ވަނީ ބުނެފަ އެވެ.

ހުޅުމާލެ ފޭސް ދޭއްގައި މި އަހަރުގެ މާރިޗް މަހު އަޅަން ފެށި ބުޅާ ފެސިލިޓީ ނިމުމަކާ ގާތްވެފައިވާއިރު އަންނަ މަހު އެ ތަނަށް ބުޅާތައް ގެންދަން ފަށާނެ ކަމަށް ކައުންސިލުން ބުނެއެވެ.

ކުރަން ޖެހޭ މައްސައްކަތް:

- ވެޓްރިނަރީ ހިދުމަށް ހޯދަން އަންނަ މީހުންނަށް ހިދުމަތް ދިނުން.

- އާންމު ޗެކަޕްތަކާއި ފަރުވާތަކާއި އަދި އޮޕަރޭޝަންތަކުގައި ވެޓެރިނޭރިއަންއަށް އެހީތެރިވުން

- ވެޓެރިނޭރިއަން އަންގާ ގޮތުގެ މަތިން ބުޅަލަށް ބޭސް ދިނުން (ކާންދިނުމާއި ބޭސްއެޅުމާއި އަދި އިންޖެކްޝަން ޖެހުން)

- ބުޅަލުގެ ލޭ ނެގުމާއި ކުޑަކަމުދާ ތަކެތި ޓެސްޓްކުރުމާއި އަދި މި ނޫނަސް އެހެނިހެން ބަލި ދެނެގަތުމަށް ކުރާ ޓެސްޓުތައް ހެދުން

- އެނެސްތީސިއާ ބެލެހެއްޓުމާއި އޮޕަރޭޝަނަށް ފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުން

އޭގެ އިތުރުން ނާސިން ފަރުވާ އާއި ސާޖިކަލް އަދި ކްލިނިކަލް އެހީތެރިކަމާއި ބުޅަލަކަށް ކަމެއް ދިމާވެ ކުއްލި ހާލަތުގައި ދޭން ޖެހޭ ފަރުވާ އާއި ވިލަރެސްކުރުމާއި މުއާމަލާތް ކުރުމާއި ތައުލީމާއި އައުޓްރީޗްގެ އިތުރުން އިންފެކްޝަން ކޮންޓްރޯލް ކުރުން ވެސް ނަރުހުންގެ މަސައްކަތުގައި ހިމެނެ އެވެ.

ހުޅުމާލެ ފަރުކޮޅުފުށި ސަރަހައްދުގައި ގާއިމުކުރަމުންދާ ބުޅާ ފެސިލިޓީގައި މިހާރު ކުރަމުން އަންނަނީ ފިނިޝިންގެ މަސައްކަތްތަކެވެ.