ހުޅުމާލޭގެ އެޕާޓްމެންޓަކަށް ވަދެ އެތަނުގެ މުދަލަށް ގެއްލުންދީފައިވާ މައްސަލައެއް ބަލަމުން އަންނަ ކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.

މިއަދު ފުލުހުން ބުނީ ހުޅުމާލޭގައި ހުންނަ ވަން އެވެނިއު އެޕާޓްމެންޓަކަށް ވަދެ އެތަނުގެ މުދަލަށް ގެއްލުންދިން މައްސަލައެއް ބަލަން ފަށާފައިވާ ކަމަށާއި މިއަދު ހެނދުނު 6:32 ހާއިރު މި އެޕާޓްމަންޓަށް ވަދެ މުދަލަށް ގެއްލުންދިން މައްސަލަ އެ އިދާރާއަށް ރިޕޯޓްކޮށްފައިވާ ކަމަށެވެ.

މި މައްސަލައާއި ގުޅިގެން ބަލަންޖެހޭ ކަންކަން ފުލުހުން ބަލަމުން އަންނަކަން އެ އިދާރާއިން ވަނީ ހާމަކޮށްފައެވެ. އަދި އިއްޔެ ފުލުހުން ބޭއްވި ނޫސްވެރިންގެ ބައްދަލުވުމެއްގައިވެސް ވަނީ ދާދި ފަހުން މާލޭގެ އަމީނީ މަގުގައި ހުންނަ ކެފޭ ޑި މާލެއަށް މޫނު ނިވާކޮށްގެން ތިބި ބަޔަކު ވަދެ ގެއްލުންދިން މައްސަލައެއް ތަހުގީގުކުރަމުން އަންނަކަން ހާމަކޮށްފައެވެ.

ފުލުހުން ބުނާ ގޮތުގައި އެފަދަ މައްސަލަތައް މިހާރު ފެންމަތިވަމުން އަންނަނީ މާލޭގައި ތިބި ގްރޫޕްތަކުގެ މެދުގައި ޖެހިފައިވާ މައްސަލަތަކުގެ ތެރެއިންނެވެ.

މާލެ ސަރަހައްދުގައި ގޭގެއަށް ވަދެ މުދަލަށް ގެއްލުންދޭ މައްސަލަތައް މަދުން ނަމަވެސް ފެންމަތިވެއެވެ. އެގޮތުން މިދިޔަ މަހު ފުލުހުންނަށް ހުށަހަޅާފައިވާ މައްސަލަތަކަށް ބަލާއިރު މުދަލަށް ގެއްލުން ދިނުމުގެ 68 މައްސަލައެއް ފާހަގަ ކުރެވެއެވެ.