ގަވާއިދާ ޚިލާފަށް މާލެއަތޮޅު ތިލަފުށީގައި އުޅެމުންދިޔަ 33 ބިދޭސީއަކު އިމިގްރޭޝަނުން ހިންގި އޮޕަރޭޝަނެއްގައި ހިފަހައްޓައިފިއެވެ.

އިމިގްރޭޝަނުން ބުނީ ތިލަފުށީގައި ގަވާއިދާ ޚިލާފަށް އުޅޭ ބިދޭސީންނަށް އަމާޒުކޮށް ޓާސްކުފޯހުން އިއްޔެ ހެނދުނު ޚާއްޞަ ރެއިޑް އޮޕަރޭޝަނެއް ހިންގާފައިވާ ކަމަށެވެ. އަދި މި އޮޕަރޭޝަންގައި އެ ރަށުން ސައްހަ ވިސާއެއް ނެތި އުޅެމުންދިއަ 33 ބިދޭސީއަކު އެ އިދާރާގެ ބެލުމުގެ ދަށަށް ގެެނެސްފައިވާ ކަމަށެވެ.

ތިލަފުށީގައި ހިންގި މި އޮޕަރޭޝަންގައި އިމިގްރޭޝަނުގެ 28 އޮފިސަރުންނާއި ފުލުހުންގެ 35 އޮފިސަރުން ބައިވެރިވިއެވެ. މި ރެއިޑުގައި 257 ބިދޭސީއަކު ޗެކްކޮށްފައިވާ ކަމަށް އިމިގްރޭޝަނުން މައުލޫމާތުދެއެވެ.

ބަންދު ކުރެވުނު މީހުންގެ އިތުރުން 22 ބިދޭސީއަކަށް ލިޔުމުން ނޯޓިސް ދީފައިވާ ކަމަށް އިމިގްރޭޝަނުން ބުނެފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރު އައިފަހުން އިމިގްރޭޝަނުން ހިންގި މިފަދަ އޮޕަރޭޝަންތަކުން މިހާތަނަށް 4،000 އަށްވުރެ ގިނަ ބިދޭސީން ވަނީ ޑީޕޯޓް ކޮށްލާފައެވެ. އަދި ގަވާއިދާ ޚިލާފަށް ބިދޭސީން ހިންގާ ތަންތަނާއި ގަވާއިދާ ޚިލާފަށް އުޅޭ ބިދޭސީން އަތުލައިގަތުމަށް ގިނަ އޮޕަރޭޝަންތަކެއް ހިންގަމުންދާކަން ފާހަގަ ކުރެވެއެވެ.