ފުލުހުން ކުރިޔަށްގެންދާ ތަހުގީގަކާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅުއްވާ ގެ ބަލައި ފާސްކުރުމާ ގުޅިގެން މީސްމީޑިއާގައި ދައުރުވަމުންދާ ވާހަކަތަކުގެ ތެރެއަށް މުޅިން އައު ބޮޅެއް މިއަދު އިތުރުވެއްޖެއެވެ.

އެގޮތުން އިއްޔެ ރާއްޖޭގެ މީޑިއާތަކުން ފަޒުލްގެ ގެއިން ފުލުހުން 1.4 މިލިއަން ރުފިޔާގެ ނަގުދު ފައިސާ ގެންގޮސްފައިވާ ކަމަށް ބުނެފައި ވަނިކޮށް ރާއްޖޭގައި ލޯންޗް ދަތުރުކުރުމުގެ ޚިދުމަތްދޭ ކުންފުންޏަކުން ރޭ ދަންވަރު ބުނެފައިވަނީ އެކުންފުނިން ފަޒުލްގެ ކުންފުންޏަކަށް 1.4 މިލިއަން ރުފިޔާގެ ނަގުދު ފައިސާ ދީފައިވާނެ ކަމަށެވެ.

އެގޮތުން ރިލެކްސް ފެރީ ސާރވިސްއިން ރޭ ދަންވަރު އެ ކުންފުނީގެ ފޭސްބުކް ޕޭޖުގައި ކުރި ޕޯސްޓެއްގައި ބުނެފައިވަނީ، 2022 ވަނަ އަހަރު ފަޒުލްގެ ކުންފުންޏާއެކު މުޢާމަލާތްކޮށް ލޯންޗެއް ބަނދެފައިވާ ކަމަށެވެ. އަދި އެ ލޯންޗުގެ ފެންވަރު ރަނގަޅުކަމުން ދެވަނަ ފަހަރަށް އިތުރު ލޯންޗެއް ބަނުމަށްޓަކައި 2024 ވަނަ އަހަރުގެ ކުރީކޮޅު މަޝްވަރާކޮށް، މިދިޔަ ޑިސެމްބަރު މަހުގެ ކުރީކޮޅު 1.4 މިލިއަން ރުފިޔާގެ ނަގުދު ފައިސާ ދީފައިވާނެ ކަމަށް އެ ކުންފުނިން ފޭސްބުކްގައި ކުރި ޕޯސްޓްގައި ވަނީ ބުނެފައެވެ.

ރިލެކްސް ކުންފުނީގެ ފޭސްބުކް ޕޯސްޓް ފަޒުލް ވަނީ ރީޕޯސްޓްވެސް ކުރަށްވާފައެވެ.



ބިންވެރިޔާ ސްކީމުން ގޯތި ނުލިބޭ ބަޔަކަށް ގޯތި ދޫކޮށްފައިވާ މައްސަލަތަކާ ގުޅިގެން ފުލުހުން ކުރަމުންދާ ތަޙުޤީޤުގެ ދަށުން، މިދިޔަ މަހުގެ 23 ވަނަ ދުވަހު ކޯޓު އަމުރަކާއެކު ފުލުހުން ވަނީ ފަޒުލްގެ ޢާއިލީގެ ބަލާ ފާސްކޮށްފައެވެ. އެގޮތުން އެ ސްކީމްގެ ދަށުން ފަޒުލްގެ ޢާއިލީ ބަޔަކަށް ގޯތިތަކެއް ދޫކުރިކަމަށްވެސް ތުހުމަތު ކުރެވިފައިވެއެވެ.

ފަޒުލް ރަޝީދުގެ ގެ ފުލުހުން ބަލައި ފާސްކުރިއިރު 1.4 މިލިއަން ރުފިޔާ ފެނިފައިވާ ކަމަށާއި، އެ ފައިސާ މިހާރު ހުރީ ފުލުހުންގެ ބެލުމުގެ ދަށުގައި ކަމަށް އިއްޔެ ގިނަ މީޑިއާތަކުން ރިޕޯޓުކޮށްފައިވެއެވެ. ނަމަވެސް ފުލުހުން މި މަޢުލޫމާތު މީޑިއާތަކަށް ކަށަވަރުކޮށްދީފައެއް ނުވެއެވެ.

ފުލުހުން ބުނެފައިވަނީ ތަޙުޤީޤުގެ ބޭނުމަށް ބައެއް ތަކެތި، އޭގެ ތެރޭގައި ބައެއް އިލެކްޓްރޯނިކް ސާމާނު ހިމެނޭ ގޮތަށް، ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

މި މައްސަލަތަކާ ގުޅިގެން ތަޙުޤީޤަށް ފުރުޞަތު ދިނުމުގެ ގޮތުން ކަމަށް ބުނެ، ފަޒުލް ވަނީ މިދިޔަ މަހުގެ 21 ވަނަ ދުވަހު އެޗްޑީސީގެ މެނޭޖިންގ ޑިރެކްޓަރުކަމުން އިސްތިޢުފާ ދެއްވާފައެވެ. އޭގެ ފަހުން އޭނާގެ ޕާސްޕޯޓު ވަނީ ހިފަހައްޓާފައެވެ.