ކަސްޓަމްސްގެ ބައެއް އޮފިސަރުންގެ މައްޗަށް ތުހުމަތުކުރެވޭ ހިޔާނާތާއި މަނީލޯންޑަރ ކުރުމުގެ މައްސަލަތަކުގައި ތުހުމަތު ކުރެވުނު އޮފިސަރުންގެ އެއްވެސް މީހަކު ރިޓަޔަރ ކޮށްފައި ނުވާނޭކަމަށް މޯލްޑިވްސް ކަސްޓަމްސް އިން ބުނެފިއެވެ.

ދިވެހި ކަސްޓަމް ޚިދުމަތުގެ މުވައްޒަފުންތަކަކަށް ތުހުމަތު ކުރެވޭ މަނީ ލޯންޑަރިންއާއި ހިޔާނާތް އަދި ރިޝްވަތުގެ މައްސަލައެއް ފުލުހުންގެ ސަމާލުކަމަށް އައިސް އެ މައްސަލަ މިދިޔަ އަހަރުގެ އޮގަސްޓް 19 ވަނަ ދުވަހު ބަލަން ފަށާފައިވާކަން ފުލުހުން ވަނީ ހާމަކޮށްފައެވެ.

މި މައްސަލައާއި ގުޅޭ ތަފުސީލު ފުލުހުން ހާމަކޮށްފައި ނުވިނަމަވެސް، ނާޖާއިޒު ގޮތުގައި 400 މިލިއަނެއްހާ ރުފިޔާ އެތަނުގެ 20 ވަރަކަށް އޮފިސަރުން ދައުރުކޮށްފައިވާކަމަށް ބުނެ މީޑިއާތަކުން ރިޕޯޓު ކޮށްފައިވެއެވެ.

މި މައްސަލަ ފުލުހުންގެ އިދާރާއިން ބަލަމުން ދަނިކޮށް، ކަސްޓަމްސްގެ ގިނަ އޮފިސަރުންތަކެއް ރިޓަޔަރ ކުރަމުން ދާކަމަށާއި އޭގެ ތެރޭގައި މި މައްސަލާގައި ހިމެނޭ ބައެއް އޮފިސަރުން ވެސް ހިމެނޭކަމުގެ ތުހުމަތު ބައެއް ފަރާތްތަކުން ވަނީ ކޮށްފައެވެ.

ތުހުމަތުތަކާއި ގުޅިގެން ކަސްޓަމުން މިއަދު ބުނީ، ކަސްޓަމްސްގެ ބައެއް އޮފިސަރުންނަށް ތުހުމަތު ކުރެވިގެން، މަނީ ލޯންޑްރިންގ، ހިޔާނާތް އަދި ރިޝްވަތާގުޅޭގޮތުން، ފުލުހުން ތަހުގީގެއް ކުރަމުން ގެންދާކަމަށް އެ އިދާރާއަށް ފުލުހުން ވަނީ އަންގާފައި ކަމަށެވެ.

އެހެންކަމުން، ތަހުގީގުގައި ހިމެނޭ އޮފިސަރުންކަމަށް ފުލުހުންގެ ހިދުމަތުން މައުލޫމާތު ދީފައިވާ އެއްވެސް އޮފިސަރެއް ކަސްޓަމުން ރިޓަޔަރކޮށްފައި ނުވާނެ ކަމަށް އެ އިދާރާއިން ވަނީ ބުނެފައެވެ.

ނަމަވެސް ފުލުހުން ބަލަމުންދާ މައްސަލާގައި ހިމެނެނީ ކިތައް އޮފިސަރުން ކަމެއް އަދި އެ ނޫން މައުލޫމާތެއް ވެސް ކަސްޓަމްސް އިން ހާމަކޮށްފައެއް ނުވެއެވެ.