އިންސާފު ހޯދައިދިނުމަށް އެދި ދަޢުލަތުގެ އިދާރާތަކަށް ދުވެދުވެ ވަރުބަލިވެ ގޮތްހުސްވެފައިވާ ކަމަށާއި އެހެންކަމުން ރައީސް ޑރ. މުޢިއްޒު އިއްޔެ ރ. މަޑުއްވަރިއަށް ކުރެއްވި ދަތުރުފުޅުގައި އޭނާ ކުރި ހިމޭން އިޙްތިޖާޖު ސިޔާސީ ނުކުރުމަށް ރ. މަޑުއްވަރީ ސްކޫލްގައި މީގެ ކުރިން ވަޒީފާ އަދާކުރަމުން ދަނިކޮށް ކުރީ ސަރުކާރުން ވަޒީފާއިން ވަކިކޮށްފައިވާ މުޢީން ޙަސަން ބުނެފިއެވެ.

އިއްޔެ ރައީސް ޑރ. މުޢިއްޒު ރ. މަޑުއްވަރިއަށް ވަޑައިގެންނެވި ވަގުތު އެމަނިކުފާނުގެ އިސްތިޤުބާލުގައި ބޯޑެއް ހިފައިގެން ހުރި މީހެއްގެ އުދާސްތައް ރައީސަށް ޙިއްސާކުރާ މަންޒަރު ދައްކުވައިދޭ ވީޑިއޯތައް މީސްމީޑިއާގައި މިހާރު ދަނީ ދައުރުވަމުންނެވެ. އަދި ރައީސް ވަނީ އެމީހާގެ ވާހަކަތައް ގާތުން އަޑުއައްސަވައި އެކަން ހިނގާފައިވާ ގޮތް ސާފުކުރަށްވާނެ ކަމަށްވެސް ވިދާޅުވެފައެވެ.

އިއްޔެގެ ވީޑިއޯ އެކި ފަރާތްތަކުން އެކިގޮތަށް މާނަކޮށް މީސްމީޑިއާގައި ދައުރުކުރަމުން ދާތީ މުޢީން ވަނީ އެކަން އެގޮތަށް ނުކުރުމަށް އެދި މީސްމީޑިއާއަށް މެސެޖެއް ދޫކޮށްލާފައެވެ. އަދި އޭނާ އަކީ އަނިޔާ ލިބިފައިވާ މީހެއް ކަމަށާއި އޭނާގެ މައްޗަށް ތުހުމަތެއް އުފައްދާފައިވަނީ ބަޔަކު ރާވައިގެން ކަމަށް މުޢީން ބުނެފައިވެއެވެ.

މުޢީނުގެ އަޑު ރައީސް ޑރ. މުޢިއްޒު އައްސަވާފައިވާތީ އެކަމަށް ޝުކުރު އަދާކުރަމުން މުޢީން ބުނެފައިވަނީ އަޑުއެހުމާއި އަމަލުކުރުމުގައި ތަފާތެއްވާކަމަށެވެ. އަދި މިއީ އޭނާ ދަޢުލަތުގެ ވެރިއެއްގެ އަރިހުގައި މިގޮތަށް އާދޭސް ދެންނެވި ފުރަތަމަ ފަހަރު ނޫންކަން ހާމަކޮށް މުޢީން ވަނީ އެކަން ސިޔާސީ ނުކުރުމަށް އެދިފައެވެ.

"އެންމެ ފުރަތަމަ އެއްވެސް ކުށެއްނެތި މި ނުހައްގު އަނިޔާ އަހަންނަށް ދިނީ އެމް.ޑީ.ޕީގެ މެޖޯރިޓީ އޮތް ވެރިކަމެއްގައެވެ. 2023 ވަނަ އަހަރު ރައީސް ސޯލިހް މި ރަށަށް ވަޑައިގެންނެވި ދުވަހު، ހަމަ މިއަދެކޭ އެއްގޮތަށް އެ އާދޭސްކުރީމެވެ. އަޑު އެއްސެވިއެވެ. ޢަމަލެއް ނުކުރައްވައެވެ. 2023 ގައި ކެމްޕޭނަށް ރައީސް ޑރ މުޢިއްޒު މިރަށަށް ވަޑައިގެންނެވި ދުވަހު ހަމަ އެ އާދޭސްތައް ކުރީމެވެ. އަޑުއެއްސެވިއެވެ.“ މުޢީން ބުނެފައިވެއެވެ.



އެހެންކަމުން ސިޔާސީ މީހުން ސިޔާސީ ވިސްނުމުގައި، އަސްލު ޙަޤީޤަތްތައް ނޭނގޭ ޙާލު، އެވެނި ވެރިއެއް މިވެނި ވެރިއެއް އެހެންނޭ މިހެންނޭ ބުނެ އެ ވީޑިއޯތަކާއި ވާހަކަތައް ނުފެތުރުމަށް އާދޭހާއެކު މުޢީން އެދިފައިވެއެވެ. އަދި އެއްވެސް ކުށެއްނެތި ލިބިފައި ހުރި އަނިޔާގެ މައްޗަށް އިތުރު އަނިޔާދޭން މަސައްކަތް ނުކުރުމަށްވެސް އޭނާ އެދިފައިވެއެވެ.

"އަހަރެންގެ ޙާލަތު އެންމެ ރަނގަޅަށް އެނގޭނީ އަހަރެން ހެއްދެވި ފަރާތަށާއި އަހަންނަށެވެ. ކިރިޔާވެސް އިންސާނިއްޔަތުކަމެއް ހުރިއްޔާ އަދި އިންސާފަށް ލޯބިކުރަންޏާ، ސިޔާސީ ފައިދާ ހާސިލްކުރަން މަސައްކަތްނުކޮށް އިންސާފަށް ގޮވާލަދީބަލާށެވެ.” މުޢީން ބުނެފައިވެއެވެ.

މުޢީން ބުނީ ރައީސް ޞާލިޙްގެ ވެރިކަމުގައި އިންސާފަށް އެދި މިނިސްޓްރީ އޮފް އެޑިޔުކޭޝަނާއި ސިވިލް ސާރވިސް ކޮމިޝަނާއި، ރައްޔިތުންގެ މަޖްލީހާއި، އޭރުގެ ދާއިރާގެ މެމްބަރާއި، އެޗްއާރުސީ.އެމާއި، ލޭބަރ ރިލޭޝަން އޮތޯރިޓީ އާއި ރައީސް އޮފީހާއި ދެންވެސް އެކަމާއި ގުޅުންހުރި ހުރިހާ ތަނެއްގައި އާދޭސްކުރި ނަމަވެސް އެކަށީގެންވާ އަޅާލުމެއް ލިބިފައިނެތް ކަމަށެވެ.

"އަޅައެއް ނުލިއެވެ. ތަފްސީލުކޮށް ހުރިހާ ވާހަކައެއް ލިޔެ ރައީސް އޮފީހަށް ސިޓީ ފޮނުވީމެވެ. ޖަވާބަކަށް ފޮނުވާފައި އޮތީ ސީއެސްސީން އަހަރެން ވަޒީފާއިން ވަކިކުރީ ޤާނޫނުގެ ކޮން މާއްދާއަކާއި ހަވާލާދީކަން ބުނެދީފައެވެ. އޭރުގެ ރައީސް ސޯލިހަށް އެ ސިޓީ ލިބުން ކަމެއް ނުލިބޭ ކަމެއް ނޭނގެއެވެ.” މުޢީންގެ މެސެޖުގައިވެއެވެ.

ހަމައެއާއެކު މުޢީން ބުނީ މި ވެރިކަމުގައިވެސް އިންސާފަށް އެދި ރަށުގެ އެތައް ބަޔަކު އިންސާފަށް ގޮވާލައި ސޮއިކޮށްފައި އޮތް ޕެޓިޝަންއަކާއިއެކު، މިނިސްޓްރީ އޮފް އެޑިޔުކޭޝަނާއި ސިވިލް ސާރވިސް ކޮމިޝަނާއި، ރައްޔިތުންގެ މަޖްލީހާއި، މިހާރުގެ ދާއިރާގެ މެމްބަރާއި، އެޗްއާރުސީ.އެމާއި، ލޭބަރ ރިލޭޝަން އޮތޯރިޓީ އާއި ދެންވެސް އެކަމާއި ގުޅުންހުރި ހުރިހާ ތަނެއްގައި އާދޭސްކުރި ނަމަވެސް މިހާތަނަށް އިންސާފު ނުލިބިވާ ކަމަށެވެ.

"އަޅައެއް ނުލިއެވެ. ތަފްސީލުކޮށް ހުރިހާ ވާހަކައެއް ލިޔެ ރައީސް އޮފީހަށް ސިޓީ ފޮނުވީމެވެ. ޖަވާބަކަށް ފޮނުވާފައި އޮތީ އިންސާފު ހޯދަން ކޯޓަށް ދިއުމަށެވެ. ރައީސް ޑރ. މުޢިއްޒުއަށް އެ ސިޓީ ލިބުން ކަމެއް ނުލިބޭ ކަމެއް ނޭނގެއެވެ. މިއަދުވެސް މިކުރީ ހަމަ އެ އާދޭހެވެ. ކުރު ދޮށިން ދިނީކީ ނޫނެވެ. އަޑު އެއްސެވިއެވެ. ޢަމަލުކުރައްވާނެކަމެއް ނޭނގެއެވެ.” މުޢީން ބުނެފައިވެއެވެ.

މުޢީން ވަނީ މިމައްސަލާގައި އިންސާފު ހޯދުމަށް ޝަރުޢީ ދާއިރާގައިވެސް މަސައްކަތް ކޮށްފައިވާ ކަމަށް ބުނެފައެވެ.

"ކޯޓްތަކަށް ދެވިއްޖެއެވެ. ކުށެއް ނުކޮށް އިންސާފު ހޯދަން އަތުން ދާންނުޖެހޭ ލައްކައެއްހާ ރުފިޔާ ޚަރަދު ވެއްޖެއެވެ. ދެން އިންސާފު ހޯދަން ދާން އޮތީ ﷲ ގެ ދަރުބާރު ނޫން ވަކި ކޮންތަނެއް ހެއްޔެވެ؟ އަހަންނަކީ ކުށްވެރިއެއް ނޫނެވެ." މުޢީންގެ މެސެޖް ނިންމާލަމުން ބުނެފައިވެއެވެ.



މުޢީން މިފަދަ މެސެޖެއް މީސްމީޑިއާއަށް ދޫކޮށްލާފައިވާއިރު މުޢީންގެ މައްޗަށް ތުހުމަތު ކުރެވުނު މައްސަލާގައި މުސާރަ ލިބޭގޮތަށް އޭނާ ފުރަތަމަ ސަސްޕެންޑްކުރީ އޭޕްރިލް 2021 ގައެވެ. އޭގެ ފަހުން ޖެހިޖެހިގެން އިތުރު 2 މަހު މުސާރަ ނުލިބޭ ގޮތަށް ސަސްޕެންޑްކުރުމަށްފަހު، ސަސްޕެންޝަން އުވާލާ އަލުން ވަޒީފާއަށް ނެރުނީ ޖޫން 2021 ގަ އެވެ.

އޭގެފަހުން ވަޒީފާއަށް ނެރެ 4 މަސް ވެގެން ދިޔައިރުވެސް، ސަސްޕެންޝަނުގައި ބެހެއްޓި މުއްދަތުގެ މުސާރަ އާއި އިނާޔަތްތައް ދީފައެއް ނުވެއެވެ. އެކަމަށް ޙައްލެއް ނުލިބިގެން އުޅެނިކޮށް ސްކޫލުން ވަނީ އޮކްޓޫބަރު 2021 ގައި މުސާރަ ނުލިބޭ ގޮތަށް އަނެއްކާވެސް 4 މަހަށް އޭނާ ސަސްޕެންޑް ކޮށްފައެވެ.

އަދި 17 ފެބުރުވަރީ 2022 ގައި އަލުން ވަޒީފާއަށް ނިކުންނަން އަންގާފައިވާއިރު އޭނާ އަދާކުރަމުންދިޔަ ލީޑިން ޓީޗަރުގެ މަޤާމް ދީފައެއް ނުވެއެވެ. އޭގެ އިތުރުން ސިވިލް ސަރވިސްގެ ލިޔުމަކުން، މުއީނަށް ޙައްޤުވާ މުސާރަ އާއި އިނާޔަތްތައް ދިނުމަށްވެސް ސުކޫލަށް އެންގި ނަމަވެސް އެ މުސާރަ އާއި އިނާޔަތްތައް ދީފައެއްވެސް ނުވެ އެވެ.

އަދި އެއަށްފަހު 27 ފެބްރުއަރީ 2022 ގައި މުސާރަ ނުލިބޭގޮތަށް އިތުރު ސަސްޕެންޝަނެއް ކުރުމަށްފަހު 19 އޭޕްރިލް 2022 ގައި، މުއީން ވަނީ ވަޒީފާ އިން ވަކިކޮށްފައެވެ.

މުޢީންގެ މައްސަލާގައި މީގެ ކުރިން ފުލުހުން ބުނެފައިވަނީ މައްސަލަ ތަހުގީގުކޮށް ޕީޖީއަށް ފޮނުވުމުން ދައުވާކުރެވޭ ވަރަށް ހެކި ނެތްކަމަށް ނިންމައި މައްސަލަ އަނބުރާ ފޮނުވާލުމުން މައްސަލަ ވަނީ ފައިލްކޮށްފައި ކަމަށެވެ. އަދި ޕީޖީ އޮފީހުން 2022 ވަނަ އަހަރު ބުނެފައިވަނީ އެމައްސަލާގައި ނިންމާފައިވާ ނިންމުން ރިވިއުކުރަންޖެހޭ ސަބަބެއް އޮތްނަމަ އެކަން ކުރާނެ ކަމަށެވެ.