ބޯކޮށް ވާރޭވެހި ކ. މާފުށީގައި ފެންބޮޑުވެފައިވާތީ ފެން ހިންދުމުގެ މަސައްކަތް ފަށައިގެން ކުރިއަށް އެބަގެންދެއެވެ.

ރާއްޖޭގެ އެކި ހިސާބުތަކަށް ބޯކޮށް ވާރޭވެހޭނެކަމަށް މޫސުމާބެހޭ ގައުމީ އިދާރާއިން ލަފާކޮށްފައިވާއިރު، މާފުއްޓަށް ބޯކޮށް ވާރޭވެހި އެ ރަށުގެ ބޮޑެތި މަގުތަކުގައި ވަނީ ވަރަށް ބޮޑަށް ފެންބޮޑުވެފައެވެ. އަދި ބައެއް ގޭގެއަށް ފެންވަނުމުގެ ސަބަބުން އެކިވަރުގެ ގެއްލުންތައް ވެފައިވާކަމަށް މައުލޫމާތު ލިބެއެވެ.

ފެންބޮޑުވުމާ ގުޅިގެން މާފުށީ ކައުންސިލުން ވަނީ ފެން ހިންދުމަށް އެ ރަށުގެ ރައްޔިތުންނާ ގުޅިގެން ކޯރެއް ކޮނެ މޫދަށް ފެން ބޭރުކުރުމުގެ މަސައްކަތް ފަށާފައެވެ. އަދި އޭގެ ފަހުން އެމްއެންޑީއެފުން ވެސް ވަނީ ޕަމްޕު ބޭނުންކޮށްގެން ފެން ބޭރުކުރުމުގެ މަސައްކަތް ފަށާފައެވެ.

ގެސްޓުހައުސް ވިޔަފާރި ވަރަށް ބޮޑަށް ފުޅާވެފައިވާ އެ ރަށުގައި ފެން ބޮޑުވުމާ ގުޅިގެން ފަތުރުވެރިންނަށް ފޯރުކޮށްދޭ ބައެއް ހިދުމަތްތަކަށް ބުރޫއަރާފައިވާކަމަށް އެ ރަށުން މައުލޫމާތު ދެއެވެ.

މޫސުން ގޯސްވާނެ ކަމަށް ލަފާކޮށް މޫސުމާބެހޭ ގައުމީ އިދާރާއިން ވަނީ ށ. އަތޮޅުން ފެށިގެން ފ. އަތޮޅަށް މިރެއާ ހަމައަށް ވައިޓް އެލާޓް ނެރެފައެވެ.