ފުވައްމުލަކަށް ޑްރަގް އެތެރެކުރިކަމުގެ ތުހުމަތުގައި ހައްޔަރުކުރި މީހާ، ފުލުހުންގެ ބަންދުން ދޫކޮށްލާފައިވާކަމަށް ފުލުހުންގެ އިދާރާއިން ބުނެފިއެވެ.

ފުލުހުންގެ އިންޓެލިޖެންސްއަށް ލިބުނު މައުލޫމާތަކާ ގުޅިގެން ހިންގި ހާއްސަ އޮޕަރޭޝަނެއްގައި ބޯޓަކުން ފުވައްމުލަކަށް ގެނައި ފޮށިގަނޑެއް ބަލައި ފާސްކޮށް ފުލުހުންގެ ބެލުމުގެ ދަށަށް މީހަކު ގެނެސްފައިވެއެވެ.

ފުލުހުން ބުނެފައިވަނީ އެ މައްސަލާގައި ތުހުމަތު ކުރެވިގެން ހައްޔަރު ކޮށްފައިވަނީ 40 އަހަރުގެ އަންހެނެއްކަމަށާ އޭނާ ހައްޔަރުކުރީ އޭނާ ހިފައިގެންދިޔަ ފޮށިގަނޑަކުން މަސްތުވާތަކެތިކަމަށް ބެލެވޭ އެއްޗެއް ފެނިފައިވާތީކަމަށެވެ.

ނަމަވެސް ފުލުހުންގެ މީޑިއާ އޮފިޝަލް ރޭ ވިދާޅުވީ، އެ މައްސަލާގައި ފުލުހުންގެ ބެލުމުގެ ދަށަށް ގެންދިޔަ އަންހެން މީހާއާ އެ މައްސަލައާ ގުޅުމެއް ނުވާކަން ކަށަވަރު ވެފައިވާކަމަށާ އެހެންކަމުން ފުލުހުންގެ ބަންދުން އޭނާ މިހާރު ދޫކޮށްލާފައިވާ ކަމަށެވެ. ނަމަވެސް އެކަން ކަށަވަރުކުރިގޮތެއް ފުލުހުން ހާމަކޮށްފައެއް ނުވެއެވެ.

އޭނާ ދޫކޮށްލިނަމަވެސް އެ މައްސަލަ އިތުރަށް ތަހުގީގު ކުރަމުންދާކަމަށް ފުލުހުން ވަނީ ބުނެފައެވެ.