ދިރާސީ އަހަރުގެ ފެށުން ބަދަލުކުރުމަށް ނިންމާފައިވާ މައްސަލާގައި ބެލެނިވެރިންގެ ހުރި ކަންބޮޑުވުންތައް ހާމަކޮށް ރައީސް އިބްރާހީމް މުޙައްމަދު ޞާލިޙަށް ޕެޓިޝަނެއް ހުށައެޅުމަށް ތައްޔާރުވެއްޖެއެވެ.

ކޯވިޑް-19ގެ ޙާލަތާއި ގުޅިގެން އެކަޑަމިކް ކަލަންޑަރަށް ބަދަލުގެނެސް އެޑިއުކޭޝަން މިނިސްޓްރީން އައު ކަލަންޑަރު ޢާންމުކޮށްފައިވަނީ އޯގަސްޓްމަހުގެ 13 ވަނަ ދުވަހު އެވެ. އައު އެކަޑަމިކް ކަލަންޑަރުގައިވާ ގޮތުން މިއަހަރުގެ ފުރަތަމަ ޓާމްގެ ކިޔެވުން ނިމޭނީ ޑިސެމްބަރު މަހުގެ 3 ވަނަ ދުވަހު އެވެ. އަދި މިއަހަރުގެ ދިރާސީ އަހަރުގެ ކިޔެވުން ނިމޭނީ އަންނަ އަހަރުގެ ޖޫންމަހުގެ 24ގައެވެ. އަދި އައު ދިރާސީ އަހަރު ފެެށޭނީ އަންނަ އަހަރުގެ އޮގަސްޓު މަހުގެ 10 ވަނަ ދުވަހު އެވެ.

ބެލެނިވެރިންގެ ޕެޓިޝަންގައި ފާހަގަކޮށްފައިވާ ކަންކަމުގެ ތެރޭގައި ދަރިވަރުންގެ ތަޢުލީމާއި، އެކުދިންގެ ޢުމުރާ އެކުދިންގެ މުޅި މުސްތަޤްބަލު ގުޅިފައިވާކަމަށް ބުނެފައިވެއެވެ. އެހެންކަމުން އަންނަ ދިރާސީ އައު އަހަރު ކުރިއެކޭވެސް އެއްގޮތަށް ޖެނުއަރީމަހު ފަށާ ދެވަނަ ދިރާސީ އަހަރު އޯގަސްޓްމަހު ފެށުމަށް ބެލެނިވެރިން ވަނީ އެދިފައެވެ.

އެގޮތުން އަންނަ އަހަރުގެ ދިރާސީ އަހަރު ނިމޭ ތާރީޚް ފަސްކުރުމުން ގްރޭޑް 10 ނިމޭ ޢުމުރު 16 އަހަރުން 17 އަހަރަށް، ކުރިއަށް އޮތް ނުވަ އަހަރު ބަދަލުވެގެންދާނެ ކަމަށާއި، ކުރިއަށް އޮތް ތިން އަހަރު ނާސަރީއާއި ޖޭކޭޖީ އަދި އެސްކޭޖީގައި ކިޔަވާ ދަރިވަރުން ގްރޭޑް 1 އަށް ވަދެވޭނީ އުމުރުން 8 އަހަރުގައިކަމަށް މި ޕެޓިޝަންގައި ބެލެނިވެރިން ވަނީ ފާހަގަކޮށްފައެވެ. މިހާރު ގްރޭޑް 1 އަށް ކުދިން ވައްދަނީ ޢުމުރުން 7 އަހަރު ގައެވެ.

ބެލެނިވެރިންގެ ކަންބޮޑުވުންތަކުގެ ތެރޭގައި މިކަމުގެ ސަބަބުން ސާނަވީ ތައުލީމް ނިންމާ ޔުނިވާސިޓީ ތަޢުލީމް ފެށޭ ޢުމުރު 20 އަހަރަށް ބަދަލުވެގެންދާނެ ކަމަށާއި، އޭގެ ބަދަލުގައި ދުނިޔޭގެ އެހެން ގައުމުތަކުގައި ވެސް ކޯވިޑް-19 ގެ ބަލިމަޑުކަމާއި ގުޅިގެން ޢަމަލުކުރި އުސޫލާ އެއްގޮތަށް ކިޔަވާ ކުދިންނަށް 2021 ވަނަ އަހަރުގެ ޖެނުއަރީ މަހު އައު ދިރާސީ އަހަރަަށް ޕްރޮމޯޓްވެވޭނެ ގޮތެއް ހަމަޖައްސައި ދަރިވަރުން ރިޕީޓް ނުވާނެ ގޮތަކަށް އިންތިޒާމްކޮށް ދިނުމަކީވެސް މުހިންމުކަމެއް ކަމަށް ޕެޓިޝަންގައި ބުނެފައިވެއެވެ.

އަންނަ އަހަރުގެ އައު ދިރާސީ އަހަރު އޯގަސްޓް މަހު ފެށުމަށް ނިންމާފައިވީ ނަމަވެސް މިއީ ދާއިމީ ބަދަލަކަށް ހެދުމަށް އަދި ނިންމާފައި ނުވާކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.