ދަތުރުދާ މީހުން ޤުދުރަތީ ދިރުންތަކަށް ގެއްލުން ނުދިނުމަށް ރައީސް ނަޝީދު އެދިވަޑައިގެންފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ރައީސް ނަޝީދު ވަނީ ފިނޮޅުތަކަށް ދަތުރުދާ މީހުން އެތަނުގައި އުޅޭ ދޫނިތަކަށް ސަމާލުކަން ދިނުމަށް އެދިވަޑައިގެންފައެވެ.

"އަޅުގަނޑު އެދޭ ކަމަކީ ފިނޮޅުތަކަށް މޫދަށް އެރިވަޑައިގަންނަވާއިރު އެދޫނިތަކަށް ވެސް ބައްލަވާލައްވާ، އެއީ ދޫނިތަކަށް އެތާ ތިއްބަސް ފުރަތަމަ އަރާގޮތަށް ފިނޮޅު ވަށާބުރެއް ޖައްސަވާ ހުރިއްޔާ ހުރި ރިނދައްޔެއް ނަންގަވާ، އެބާވަތުގެ ކަންތައް ނުކުރައްވާ، ދޫނިތަކާ ވެސް އެކީގައި މޫދަށް އެރި އުޅުއްވުމަށް އަޅުގަނޑު ވަރަށް އެދެން." ރައީސް ނަޝީދު ވިދާޅުވި އެވެ.

ރައީސް ނަޝީދު ވިދާޅުވީ ކޯވިޑް-19 އާ ގުޅިގެން ބަންދުވެފައި މިދިޔަ ދުވަސްތަކުގައި ރާއްޖޭގެ ދޫނިތަކަށް ބިސް އަޅައި ވިހާނެ ޖާގަ އާއި މުއްދަތު ލިބިގެން ގޮސްފި ކަމަށެވެ. އަދި ރާއްޖޭގެ ގިނަ ތުނޑިތަކާއި ފިނޮޅުތަކުގައި ދޫނިތައް ގިނަކަން ފާހަގަކުރެވޭނެ ކަމަށް ވެސް އެމަނިކުފާނު ވިދާޅުވި އެވެ.

ރައީސް ނަޝީދަކީ ތިމާވެށީގެ މައްސަލަތަކުގައި ދުނިޔޭގެ ފެންވަރުގައި އަޑުއުފުއްލަވަމުން ގެންދަވާ ބޭފުޅެކެވެ.