ކީރިތި ޤުރުއާނާއި ދޭތެރޭގައި އެމަނިކުފާނުގެ ހިތްޕުޅުގައި އެއްވެސް ޝައްކެއް ނެތް ކަމަށާއި، އެއަށް ވުރެ މާބޮޑަށް ކީރިތި ޤުރުއާނަށް ޤަދަރު ކުރަށްވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި ޤުރުޢާނާމެދު ރައީސް ނަޝީދަށް ވިސްނިވަޑައިގެންފައި އޮންނަގޮތް ގޯސް ކަމަށް މަޖިލީހުގެ މައިނޯރިޓީ ލީޑަރ އޭދަފުށީ ދާއިރާގެ، އަޙްމަދު ސަލީމް ވިދާޅުވުމުން ރައީސް ނަޝީދު ވަނީ ސަލީމްގެ ވާހަކަ ހުއްޓުވުމަށްފަހު ކޯފާވެ ހުންނަވާ އެކަމަށް ރައްދު ދެއްވާފައެވެ.

"ޢިއްޒަތްތެރި މެމްބަރު ތި މޭރުމަކުން ވާހަކައެއް ނުދެއްކެވޭނެ އިނގޭތޯ. ޤުރުއާނާ ދޭތެރޭގައި އަޅުގަނޑުގެ ހިތުގައި އެއްވެސް ޝައްކެއް އޮވެގެންނެއް ނޫން މި ދެންނެވީކީއެއް. އޮތް ޤަދަރެއްގެ ބޮޑުކަމުން. ޢިއްޒަތްތެރި މެމްބަރަށް ކުށް ވިދާޅުވެވޭ އިރުގައި އަޅުގަނޑަށް ނޭންގި މިތަނުގައި އެ ކުށް ޤަބޫލުކޮށްގެން ކުރިއަށް ގެންދެވިދާނެތީވެ." ރައީސް ނަޝީދު ވިދާޅުވިއެވެ.

އިއްޔެގެ ޖަލްސާގައި އޭދަފުށީ ދާއިރާގެ މެމްބަރު އަޙްމަދު ސަލީމް ކީރިތި ޤުރުއާންގެ އާޔަތެއް ކިޔައި މާނަ ވިދާޅުވާން ފެށުމުން ރައީސް ނަޝީދު ވަނީ އެކަން އެގޮތަށް ނުކުރުމަށް އެދިލައްވާފައެވެ. އަދި މަޖިލީހުގައި ޝޭޚުން މަދު ކަމަށާއި، މެމްބަރުންނަކީ ދީނީ ޢިލްމު ވެރިން ނޫން ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ، އެމަނިކުފާން ގުރުއާން ހިތުދަސް ނޫން ކަމަށާއި، އެހެންކަމުން އެމަނިކުފާން ރިޔާސަތުގައި އިންނައިރު މެމްބަރުން ގުރުއާނުގެ އާޔަތްތައް ވިދާޅުވުމުން އޭގެ ސައްހަކަން އެމަނިކުފާނަށް ކަށަވަރު ނުކުރެވޭ ކަމަށެވެ. މަޖިލީހުގެ ޤަވާއިދުގައި އޮންނަނީ އިސްލާމްދީނުގެ އަސްލުތަކާއި ޚިލާފްނުވާނެ ގޮތަށް ކޮންމެ ވާހަކައެއްވެސް މަޖިލީހުގެ ތަޅުމުގައި ދެއްކޭނެ ކަމަށެވެ.