ރާއްޖެ އިން މިއަހަރު ޙައްޖުގެ އަޅުކަމަށް ދާ ދިވެހިންގެ ދެވަނަ ގްރޫޕް ސައުދީ އަރަބިއްޔާއަށް މިއަދު ފުރައިފިއެވެ.

ރާއްޖެއިން ޙައްޖަށްދާ މީހުންގެ ފުރަތަމަ ފްލައިޓުގައި 238 މީހުން ސައޫދިއާ އެއާލައިންގައި ފުރާފައި ވަނީ މިމަހުގެ 15 ވަނަ ދުވަހުއެވެ. އަދި ދެވަނަ ގްރޫޕް ފުރީ މިއަދު ހެނދުނު 7:10 ގައެވެ. މޯލްޑިވިއަންގެ ފްލައިޓުން 260 ޙައްޖާޖީން ވަނީ މިއަދު ސަޢުދީއަށް ގޮސްފައެވެ. ދިވެހިރާއްޖެއަށް މިއަހަރުވެސް ޙައްޖުގެ އަޅުކަމަށް ރަސްމީ 1000 ކޯޓާ ވަނީ ލިބިފަ އެވެ.

ޙައްޖު މޫސުމުގައި އިސްލާމީ ކަންތައްތަކާ ބެހޭ ވުޒާރާއިން މައްކާގައި ޤާއިމުކުރާ ދިވެހި ޙައްޖުވެރިންގެ ކަންކަމާ ބެހޭ އޮފީހުގެ ވެރިއަކަށް ހަމަޖައްސަވާފައިވަނީ ދިވެހިރާއްޖޭގެ ޒަކާތު ހައުސްގެ ޑިރެކްޓަރ ޖެނެރަލް އައްޝައިޚް އިމްޠިޠާޢު ޢައްބާސްއެވެ. އަދި މިއަހަރުގެ ޙައްޖުވެރިންގެ އިސް ޝައިޚެއްގެ ގޮތުގައި ވަޑައިގަންނަވާނީ އިސްލާމީ ފަތުވާދޭ އެންމެ މަތީ މަޖިލީހުގެ މެންބަރު ޑރ. އިލްޔާސް ޙުސައިނެވެ.

ދިވެހި ޙައްޖުވެރިން ސަޢުދީއަށް ފުރަން ފަށާފައިވާއިރު، އިތުރު 2 ފްލައިޓް މި މަހު 18 އަދި 19 ވަނަ ދުވަހު ފުރާނެއެވެ. މި ދަތުރުތައް ކުރިއަށްދާނީ މޯލްޑިވިއަން އާއި ސައުދީ އެއަރލައިންގެ ފްލައިޓްތަކުގައެވެ. ޙައްޖުވެރިންނާ ގުޅޭ އެންމެހާ އިންތިޒާމުތައް މިހާރު ފުރިހަމަކޮށްފައިވާކަމަށް ސަރުކާރުން މަޢުލޫމާތު ދެއެވެ.

ކަލަންޑަރުގައިވާ ގޮތުން މިއަހަރުގެ ޙައްޖު ދުވަހަކީ މި މަހުގެ 26 ވަނަ ދުވަހެވެ. ޙައްޖުވެރިން މައްކާގައި ޖުމްލަ 21 ދުވަސް ހޭދަކުރާނެއެވެ. ޙައްޖުގެ މަތިވެރި އަޅުކަން އަދާކުރުމަށްފަހު، ޙައްޖާޖީން އެނބުރި ރާއްޖެ އައުމަށް ހަމަޖެހިފައިވަނީ އަންނަ ޖޫން މަހުގެ 5 އިން 9 އާ ދެމެދުގެ ތާރީޚުތަކުގައެވެ.