މި ސަރުކާރު ވައްޓާލަން ރައީސް ޔާމީން އުޅުއްވުމަކީ ބަލައިގަނެވޭނެ ކަމެއް ނޫންކަމަށް ޝެއިހް އަލީ ޒައިދު ވިދާޅުވެއްޖެ އެވެ.

ރައީސް ޔާމީންގެ މައްޗަށް ކޮށްފައިވާ 11 އަހަރުގެ ޖަލު ޙުކުމް ހައިކޯޓުން އިއްޔެ ބާތިލް ކުރުމާ ގުޅިގެން ރައީސް ޔާމީން އިއްޔެ ވިދާޅުވީ މަޖިލީސް އިންތިޚާބުގައި އިދިކޮޅު އެމްޑީޕީއާއެކު ބައެއް މަސައްކަތްތައް ކުރަށްވަމުން ގެންދަވާ ކަމަށެވެ.

އެކަމާ ގުޅިގެން ކަންބޮޑުވުން ފާޅުކުރަށްވަމުން ޒައިދު ވިދާޅުވީ އެންމެ ރީތިގޮތަކީ ރައީސް ޔާމީން ރައީސް ޑރ. މުޢިއްޒުގެ އަރިހުން މާފަށް އެދިވަޑައިގަތުމަށްފަހު ޝުކުރު ދެންނެވުން ކަމަށެވެ.

އެގޮތުން 2023 ވަނަ އަހަރުގެ އިންތިޚާބު ރައީސް ޔާމީންގެ އެންގެވުމާ އެއްގޮތަށް ޕީޕީއެމުން ބޮއިކޮޓް ކުރިނަމަ ކޯޓުތައް މިނިވަން ނުވާނެ ކަމަށާއި މިއަދުވެސް ރައީސް ޔާމީން ހުންނަވަން ޖެހިވަޑައިގަންނަވާނީ ޖަލުގައި ކަމަށް ޒައިދު ވިދާޅުވިއެވެ.

“އެ ހެޔޮކަން ބޮލާލައި ޖަހައި ސަރުކާރު ވައްޓާލަން މިހާރު އުޅުއްވުން ބަލައެއް ނުގަނެވޭ.” ޒައިދު ވިދާޅުވިއެވެ.

Aslu rythi gothaky RY, Raees @MMuizzu arihun maafah edhi shukuru dhennevun! Eiy e dhuvahu boycott kurinama, court thah minivan nuve, MDP dhaurugai ai hukum ge mathyga adhives RY hunnavan jehunys! E heyokan bolalaa jahai Sarukaaru vattaalan mihaar ulhuhvun balainuganevey!

— Ali Zaid (@alizaid1000) April 19, 2024

ޒައިދު މި މޭރުމުން ވިދާޅުވެފައި ވާއިރު ރިޝްވަތާ މަނީލޯންޑަރިންގެ ކުށް ސާބިތުވެ ރައީސް ޔާމީން މިދިޔަ 1250 ދުވަސް ވަންދެން ހުންނެވީ 11 އަހަރުގެ ޖަލު ހުކުމެއްގައެވެ.

އެ ހުކުމް ހައިކޯޓުގައި އިސްތިއުނާފު ކުރުމުން ހައިކޯޓުން މައްސަލަ ބެލުމަށްފަހު ރައީސް ޔާމީން މިނިވަން ކޮށްފައިވަނީ އިއްޔެއެވެ.