ދިވެހިންނަށް ފަހިވާގޮތަށް ފަތުރުވެރިކަމުގެ ސިނާއަތް ބަދަލުވާން ޖެހޭކަމަށް މޯލްޑިވްސް ނެޝަނަލް ޕާޓީގެ ރައީސް ކާނަލް ރިޓަޔަރޑް މުޙައްމަދު ނާޒިމް ވިދާޅުވެއްޖެއެވެ.

ރާއްޖޭގެ ފަތުރުވެރިކަމަށް 50 އަހަރު ފުރުމާ ގުޅިގެން ދަނގެތީދާއިރާގެ ރައްޔިތުންގެ މަޖިލީހުގެ މެންބަރު ނާޒިމް ވަނީ ފަތުރުވެރިކަމުގެ ދުވަހުގެ ހެޔޮއެދުންތައް ސިނާއަތުގައި ޝާމިލުވާ އެންމެ ފަރާތްތަކަށް ދަންނަވާފައެވެ. ނާޒިމް ވިދާޅުވީ ރާއްޖޭގައި 166 ރިޒޯޓު ހިންގަމުންދިޔަ ނަމަވެސް ދިވެހިންގެ ފުރިހަމަ ބާރު ދާއިރާގައި ނެތްކަމަށެވެ.

ނާޒިމް ވިދާޅުވީ ދިވެހިންގެ އަމިއްލަ ރިޒޯޓު ތަކުގެ ޢަދަދު ނިސްބަތުން ރާއްޖޭގައި ވަރަށްމަދު ކަމަށެވެ. އެހެންކަމުން ދިވެހިންނަށް ފަހިވާގޮތަށް ފަތުރުވެރިކަމުގެ ސިނާއަތް ބަދަލުވާން ޖެހޭކަމަށް ނާޒިމް ވަނީ ވިދާޅުވެފައެވެ.

ގައުމީ ފަތުރުވެރިކަމުގެ ދުވަހުގެ ހެޔޮއެދުންތައް އެ ސިނާއަތުގައި ޝާމިލުވާ އެންމެ ފަރާތްތަކަށް ދަންނަވަން.

ރާއްޖޭގައި ހިނގަހިނގާ އޮތް 166 ރިޒޯޓު އޮތްއިރު ދިވެހިންގެ ފުރިހަމަ ބާރު ހިނގާ އަދި ދިވެހިންގެ ކިތައް ރިޒޯޓު އެބައޮތްތޯ؟ ދިވެހިންނަށް ފަހިވާގޮތަށް ސިނާއަތް ބަދަލުވާން ޖެހޭ.

— Mohamed Nazim MP (@nazim7878) October 3, 2022

ޤައުމީ ފަތުރުވެރިކަމުގެ ދުވަހުގެ ގޮތުގައި 3 އޮކްޓޫބަރު ފާހަގަކުރެއްވުމަށް ރައީސުލްޖުމްހޫރިއްޔާ ހަމަޖެއްސެވީ، 1972 ވަނަ އަހަރުގެ އޮކްޓޫބަރު މަހުގެ 3 ވަނަ ދުވަހު މާލެ އަތޮޅު ވިހަމަނާފުށީގައި، ކުރުނބާ ވިލެޖްގެ ނަމުގައި ރާއްޖޭގެ ފުރަތަމަ ރިސޯޓް ހުޅުވާފައިވާތީ އެކަމާ ގުޅުވައިގެންނެވެ.